काठमाडौं, 1 दिसम्बर 2022
नेपाली कांग्रेस नेता तथा प्रतिनिधिसभा सदस्य डा. शेखर कोइरालाले कांग्रेसकै नेतृत्वमा सरकार बन्ने बताएका छन् । विराटनगर–९ स्थित कोइराला निवासमा आज आयोजित पत्रकार सम्मेलनमा उनले नयाँ सरकारमा नेकपा (माओवादी केन्द्र), नेकपा (एकीकृत समाजवादी )सहित थप अन्य दल सरकारमा सहभागी हुने दाबी गरे । नेता डा कोइरालाले कांग्रेस संसदीय दलको नेताको सर्वसम्मति चयन अथवा निर्वाचन के गर्ने भन्ने विषयमा पार्टी सभापति र पार्टीका साथीसँग सल्लाह गरेर निर्णय गरिने जानकारी दिए ।
उनले मुलुकको समृद्धिका लागि सुशासन कायम गर्न र भ्रष्टाचार न्यूनीकरण गर्न अत्यन्त जरुरी रहेको छ भने ।
‘संसदीय दलको नेता नभए पनि संसदमा बोल्नेमा कसैले रोक्दैन । गलत भयो भने त्यसको विरोध संसदमा पनि गर्छौं, सडकमा पनि गर्छौ । गलत कामको विरुद्धमा संसदमा बोल्नलाई ह्वीपले छेक्दैन,’ उनले भने ।
उनले शेरबहादुर देउवा र शेखर कोइराला मिले भन्ने भनेर गलत प्रचार गरेको समेत बताए । ‘चुनावमा टिकट दिने विषयलाई लिएर मैले हामी मिलेर नै टिकट वितरण गरेका हौं, तपाईंहरू तल किन झगडा गर्नुहुन्छ भनेर भनेको थिएँ,’ उनले भने, ‘पार्टीभित्रका विंसगतिका विषयमा पार्टीभित्र म आवाज उठाइरहन्छु।’
नेता डा कोइरालाले यही मङ्सिर ४ गते सम्पन्न प्रतिनिधि तथा प्रदेशसभा निर्वाचन निष्पक्ष, धाँधलीरहित रुपमा सम्पन्न भएको र लोकतन्त्रको संरक्षणका लागि मतदाताले कांग्रेसलाई सबैभन्दा ठूलो पार्टी बनाएकामा धन्यवाद समेत दिए ।
