काठमाडौं, 14 फरवरी 2023
नेकपा एमालेका अध्यक्ष केपी शर्मा ओलीले प्रेम दिवसको शुभकामना दिएका छन्। आज (मंगलबार) पार्टी निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) को २३ औं महाधिवेशनको उद्घाटन सत्रलाई सम्बोधन गर्दै ओलीले प्रेम दिवसको शुभकामना दिएका हुन्।
‘सबैलाई धेरै शुभकामना छ। ह्याप्पी भ्यालेन्टाइन,’ ओलीले भने, ‘तपाईहरुले लभ यु केपी बा भन्नुहुन्छ। तपाईहरुलाई आइ लभ यु टु।’
अध्यक्ष ओलीले झण्डै दुइतिहाईको नजिक पुगेको वामपन्थी आन्दोलन जोगाउन नसकेको समेत बताएका छन् । वामपन्थी आन्दोलन टुटाउन पार्टीभित्रकै केही मान्छे लागेको उनले बताए । बाहिरी प्रहारले भन्दापनि आन्तरिक प्रहारका कारण पार्टीलाई ध्वस्त बनाउन खोजेको उनले बताए । ‘हामीलाई घेराबन्दीमा पारिएकै हो । हामी घेराबन्दीमा पर्यौं । झण्डै दुईतिहाईको अवस्थामा पुगेको वामपन्थी आन्दोलनलाई जोगाउन दिएनन् । जोगाउन सकिएन । त्यसमाथि प्रहार भयो । भित्रैबाट प्रहार, बाहिरैबाट प्रहार । बाहिरको प्रहारलाई त हामी सजिलैसँग झेल्थ्यो तर भित्रको प्रहारलाई झेल्न सकिएन । भित्रैका प्रहारले हामीलाई ध्वस्त बनायो,’ उनले भने ।
माओवादी केन्द्र र एमाले मिलेर बनेको तत्कालीन नेकपा कायमै रहेको अवस्थामा आफूलाई पार्टीको साधरण सदस्यसमेत नरहने गरी पार्टीबाट निस्कासन गरिएको उनले स्मरण गरे । यसरी चौतर्फी धेराबन्दीमा पारेर पार्टीलाई ध्वस्त बनाएपनि अहिले पार्टी उठिसकेको उनको दाबी छ ।
