ओडिशा रेल दुर्घटना अपडेट – एक जना नेपालीको मृत्यु, एक घाइते
दिल्ली, 7 जुन 2023 | भारतको ओडिशा राज्यमा भएको रेल दुर्घटनामा एकजना नेपालीले ज्यान गुमाएका छन् । पछिल्लो अपडेट अनुसार एक जनाले ज्यान गुमाएको र एक जना गम्भिर घाइते रहेको जानकारी नेशनल लाईभ टिभीलाई प्राप्त भएको छ ।
छिपहरमाई गाउँपालिका ६, विसुवा पर्सा जिल्ला निवासी प्रहलाद पासवानका २० वर्षीय छोरा अमृत पासवानको भुवनेश्वरको एम्स अस्पातलमा निधन भएको छ । मृतकका दाजु दिपक पासवान घटनाको जानकारी पाए पछि चेन्नईको त्रियावाकुक्मबाट भूवनेश्वर पुगेका छन् ।
सोही रेल दुर्घटनामा परि एकै गाउँका रामानन्द पासवान घाइते भई कटको एससिबी मेडिकल कलेजमा उपचाररत छन् । उनको खुट्टामा मल्टिपल फ्याक्चरहरु भएता पनि सुधारको क्रममा रहेको जानकारी प्राप्त भएको छ। मूल प्रवाह अखिल भारत नेपाली एकता समाज पूर्वी भारत क्षेत्रीय समितिका अध्यक्ष हेमकुमार थापाले स्वयं अस्पतालमा पुगि जानकारी दिएका छन् ।
नेपालबाट पनि आफन्तको खोजिमा धैरे जनाहरु त्यहां पुगेर अस्पताल, अस्पतालमा आफ्नो मान्छेको खोजिमा लागेका छन्। दुर्घटनामा ज्यान गुमाउनेका आफन्तहरू अहिले भुवनेश्वरका अस्पतालमा आफन्तको शव खोज्न भौंतारिइरहेका छन्। यसरी भौंतारिनेमा नेपालबाट आएका दुई दिदीबहिनी सहित चार जना आफन्त पनि छन्। उनीहरूलाई कहाँ जाने र कसलाई सम्पर्क गर्दा आफन्तको शव पाउन सकिएला भन्ने अन्योल छ। जेठ २२ गते भुवनेश्वर आइपुगेका उनीहरू आफन्तको शव खोज्दै त्यहाँ तीन वटा अस्पताल पुगिसके। तर, कहीं पनि उनीहरूले आफन्तको पत्तो पाउन सकेका छैनन्।
