राजकुमार र श्रद्धाको ‘स्त्री २’ को छायांकन सुरू
दिल्ली, 27 जुन 2023
बलिउड चर्चित कलाकार राजकुमार राव र श्रद्धा कपूरको फिल्म ‘स्त्री २’ को छायांकन सुरू भएको छ। दर्शकले सन् २०१८ मा प्रदर्शन भएको फिल्म ‘स्त्री’ लाई रूचाएका थिए।
केही दिनअघि ‘स्त्री २’ को निर्माण घोषणा गरिएको थियो। यसैबीच फिल्मका मुख्य कलाकार श्रद्धा कपूर र राजकुमार रावले फिल्म सेटबाट एक तस्बिर सार्वजनिक गरेका छन्।
राजकुमारले आफ्नो इन्स्टाग्राममा सोमबार श्रद्धासँगको तस्बिर सार्वजनिक गर्दै लेखेका छन्, ‘स्त्री र पुरुषको फेरि भेट भएपछि के होला?’
अमर कोशिशले निर्देशन गरिरहेको फिल्ममा राजकुमार र श्रद्धासँगै पंकज त्रिपाठी र अभिषेक बनर्जीको मुख्य भूमिका रहनेछ।
फिल्म ‘स्त्री’ मा एक अदृश्य युवतीसँग गाउँलेहरू डराउने कथा देखाइएको थियो। फिल्मको दोस्राे भागमा अदृश्य युवतीको रहस्य खुल्ने बताइएको छ।
यो फिल्म सन् २०२४ अगस्त ३१ मा प्रदर्शन हुनेछ।
