विद्युत व्यापार सरकारको प्राथमिकतामा : प्रधानमन्त्री प्रचण्ड
काठमाडौं, 22 अगस्ट 2023
प्रधानमन्त्री पुष्पकमल दाहाल प्रचण्डले अन्तरदेसीय ट्रान्समिसन लाइन विस्तार गरी विद्युत् व्यापारलाई प्राथमिकता दिएको बताएका छन् ।
आज मंगलबार चितवनमा भरतपुर २२०/१३२ किलोभोल्ट (केभी) सबस्टेसन र हेटौंडा–भरतपुर–बर्दघाट २२० केभी डबल सर्किट प्रसारण लाइनको उद्घाटन गर्दै प्रधानमन्त्री प्रचण्डले वर्तमान सरकार विद्युत् उत्पादनबाट देशको अर्थतन्त्रमा आत्मनिर्भर हुने सपना पूरा गर्न लागि परेको भन्दै यसका लागि अन्तरदेशीय ट्रान्समिसन लाइन विस्तार गरि विद्युत् व्यापारलाई प्राथमिकता दिएको बताए ।
हालैको भारत भ्रमणमा भारत सरकारसँग विद्युत् खरिदमा भएको समझदारीले यसका लागि सकारात्मक पहल भएको र बंगलादेशसँग विद्युत् व्यापारको ढोका खुलेको जिकिर गरे ।
‘एउटा छिमेकी देश भारतसँग १० वर्षमा १० हजार मेगावाट बिजुली व्यापार गर्ने प्रारम्भिक सम्झौतामा हस्ताक्षर भएको छ, यसलाई चाँडै अन्तिम हस्ताक्षर गर्दैछौ । नेपालको बिजुली बङ्गलादेशसम्म पुर्याउन तीन देशबीच सैद्धान्तिक सहमति भइसकेको छ’, उहाँले भन्नुभयो, ‘अर्को छिमेकी देश चीनको भ्रमणमा छिट्टै जाँदैछु, चीनसँग प्रसारण लाइन र बिजुली व्यापारका विषयमा सम्झौताहरू हुँदैछन्, यसबाट देशको अर्थतन्त्रमा ठूलो सहयोग पुग्ने छ ।’
उनले आफ्नो आसन्न चीन भ्रमणमा पनि विद्युत् व्यापारसम्बन्धी कुराकानी हुने बताए । प्रधानमन्त्री प्रचण्डले विद्युत् विकासमा उत्पादन, प्रशारण र वितरणको नीति लिइनुपर्नेमा पनि जोड दिए ।
बंगलादेशसँग विद्युत व्यापारको ढोका खुलेको बताउँदै प्रधानमन्त्री दाहालले आसन्न चीन भ्रमणमा पनि विद्युत व्यापारको सम्भावना रहेको जानकारी दिए । यद्यपि प्रधानमन्त्रीले आफूहरूको जोड बढि भन्दा बढि स्वदेशमा विद्युत खपत गरी जनताको जीवनस्तर उकास्नतर्फ नै सरकारको जोड रहेको पनि स्पष्ट पारे ।
नेपाल सरकार तथा नेपाल विद्युत प्राधिकरणको लगानी र युरोपेली लगानी बैंक (ईआइबी) को सहुलियतपूर्ण ऋणमा सब स्टेसन र नेपाल सरकार तथा प्राधिकरणको लगानी र विश्व बैंकको सहुलियतपूर्ण ऋणमा हेटौंडा-भरतपुर-बर्दघाट २२० केभी प्रसारण लाइन निर्माण गरिएको हो ।
यो समाचार पनि पढनुहोस्…
- जातीय विभेद् गर्नेलाई राज्यले आजीवन कारावासको सजाय दिनुपर्छ
- महाकालीमा पानीको सतह बढेपछि सवारीसाधन रोकिए