काठमाडौं, 26 अक्टोबर 2023
रामेछापको खाँडादेवी गाउँपालिका-५ पकरबासको सल्लेनी वनमा रहेको मदन भण्डारीको सालिक तोडफोड गरिएको छ । खाँडादेवी गाउँपालिका-५ का वडाध्यक्ष मनोज पौडेलका अनुसार महाअष्टमीको राति अज्ञान व्यक्तिले सालिक तोडफोड गरेका हुन् ।
डोरमणि पौडेल मुख्यमन्त्री हुँदा वाग्मती प्रदेश सरकार, खाँडादेवी गाउँपालिका र वडा कार्यालय समेतको लगानीमा पार्क निर्माण गरी मदन भण्डारीको सालिक राखिएको थियो । सदरमुकाम मन्थली र आसपासका क्षेत्र तथा खाँडादेवी गाउँपालिकाका मानिसलाई घुम्न जान सो पार्क निर्माण गरिएको थियो । तोडफोड कसले गरेको हो अहिलेसम्म पत्ता लागेको छैन ।
पार्कमा राखिएको मदन भण्डारीको सालिकको एउटा गोडा भाँचेर फालिएको छ । त्यस्तै सालिकको पनि विभिन्न भागमा ढुङ्गाले हानेको कारण चोट लागेको छ । यस अघि पनि सो पार्कको गेटमा लगाइएको ताला फोडिएको थियो । पटक पटक ताला फोडिएपछि ताला लगाउन छाडिएकोमा अहिले सालिक नै तोडफोड गरिएको पौडेलले बताए ।
जंगल बिचमा रहेको उक्त पार्कमा सुरक्षा व्यवस्था छैन । वरिपरी कसैको बसोवास समेत छैन । नेकपा एमाले र एमाले समर्थित कार्यकर्ताले भण्डारीको सालिक तोडफोड गर्ने कार्य निन्दनीय भएको बताएका छन् । सालिक विनाश गर्ने जो सुकै भएपनि खोजतलास र अनुसन्धान गरी कानुनी कारबाही गर्न एमालेले माग गरेको छ ।
