आज शाहरुखको ५८ औं जन्मदिन, फ्यानको भीड नियन्त्रण गर्न लाठीचार्ज
काठमाडौं ,2 नोभेम्बर 2023
बलिउड अभिनेता भारतको मुम्बईस्थित आफ्नो निवास मन्नतबाहिर बिहीवार बिहानै फ्यानलाई अभिवादन गर्दै ।
बलिउड अभिनेता शाहरुख खान बिहीवार ५८ औं जन्मदिन मनाउँदैछन् । हरेक वर्षजस्तै यसवर्ष पनि उनले भारतको मुम्बईस्थित आफ्नो निवास मन्नतबाहिर भेला भएका सयौं फ्यानलाई अभिवादन गरे ।
आफ्ना प्रिय सुपरस्टारलाई जन्मदिनको शुभकामना दिन फ्यान रातीदेखि नै मन्नतबाहिर भेला भएका थिए । फ्यानले आतिशबाजी, हुटिङ र कोलाहल गरेर खुशी व्यक्त गरे । शाहरुखले पनि मन्नतको रेलिङमा चढेर फ्यानलाई धन्यवाद दिए । शाहरुखको एक झलक हेर्न उर्लिएको भीड नियन्त्रणबाहिर गएपछि प्रहरीले लाठिचार्ज गर्नुपरेको थियो ।
राति १२ बजेपछि शाहरुख कालो टी-सर्ट, क्याप, कार्गो जिन्स र कालो चस्मा लगाएर मन्नतको रेलिङमा देखापरे । उनले फ्लाइङ किस र थम्ब्स अप गर्दै फ्यानलाई धन्यवाद दिएका छन् । शाहरुखलाई देखेर भीडले उनको जन्मदिनको गीत गाए र चर्को स्वरमा हल्ला गर्न थाले ।
शाहरुख आउनुअघि उनलाई एक झलक पाउनका लागि ब्यारिकेडको लाइन अगाडि आएका फ्यानलाई फेरि धकेल्दै मन्नत बाहिर तैनाथ प्रहरीले लाठीचार्ज गरी भीडलाई नियन्त्रणमा लिएको थियो ।
शाहरुख हरेक जन्मदिनमा आफ्ना फ्यानका लागि मन्नतको रेलिङमा आउँछन् र फ्यानलाई धन्यवाद दिन्छन् । बर्थडे बाहेक शाहरुख ईद र आफ्नो फिल्मको रिलिज वा सफलतापछि रेलिङमा आउँछन् । मन्नत बाहिर दिनहुँ धेरै फ्यान भेला हुन्छन् ।
