पाँच महिनामै राजनीति छाडिन् एलिजा गौमतले
काठमाडौं, 6 जुलाई 2023
नायिका,मोडेल तथा नागरिक उन्मुक्ति पार्टीकी नेतृ एलिजा गौतमले राजनीति त्यागेको घोषणा गरेकी छिन् । पाँच महिना अघि रेशम चौधरी नेतृत्वको नागरिक उन्मुक्तिमा प्रवेश गरेकी गौतमले एकाएक सक्रिय राजनीतिबाट सन्यास लिएको सामाजिक सञ्जालमार्फत घोषणा गरेकी हुन् । नागरिक उन्मुक्तिका संस्थापक रेशम चौधरीलाई जेलबाट छुटाउन आन्दोलनमा एलिजा पनि सक्रिय थिइन्।
सक्रिय राजनीतिबाट बिदा लिएको घोषणा सँगै एलिजाले धरान उपमहानगरपालिकाका मेयर हर्क साम्पाङको कामको प्रशंसासमेत गरेकी छिन् ।
हाल एलिजाले लेखेकी छिन्, ‘ उहाँ धराने जनताको सुख र सुविधाका लागि अहोरात्र खटिरहनुभएको छ । उहाँप्रति सधैँ उच्च सम्मान छ । देश र जनताको लागि केही गर्छु भन्ने जो कोहीलाई पनि हर्कजी प्रेरणाको स्रोत हुनुहुन्छ । ’
यसका साथै काठमाडौँका मेयर बालेन साहसँग वृक्षारोपण गर्न पाउँदा निकै खुसी भएको बताएकी छिन् ।
साथै उनले सक्रिय राजनीतिक गर्नेहरूलाई एक पटक धरान पुगेर हर्कको काम हेर्न अनुरोध पनि गरेकी छिन् । उनले अब आफ्ना आगामी दिन समाजसेवामा नै सक्रिय हुने बताएकी छिन् ।
