अछाम, 19 अगस्त, हिम शाह
अछामको रामारोशन गाउँपालिकामा मंगलबार राति आएको बाढीले बगाउँदा ७ जनाको मृत्यु भएको छ । बाढीमा परेर १७ जना अझै वेपत्ता रहेका छन् । बाढीले बगाएर मृत्युभएका मध्ये ४ जनाको शव बान्नीगढी जयगढ गाउँपालिका–६ दर्नाको कोसेडा क्षेत्रमा भेटिएको छ भने २ जनाको शव मंगलसेन नगरपालिका –३ रलेको लमतणा र सेरीमा भेटिएको छ । तर, मृतकहरुको सनाखत भने अझै भैसकेको छैन । उद्दारका लागि हेलिकोप्टर पठाइदिन आग्रह गरेको प्रमुख जिल्ला अधिकारी गोकर्णप्रसाद उपाध्यायले बताउनुभयो । कैलाश खोलाको बाढीले कैयौं घर र पक्की पुललाई समेत बगाएको छ । बाढीले दर्जनौं परिवार विस्थापित भएका छन् ।
दर्नामा पक्की पुलसमेत बगाएको छ । खालबजार, सैनीबजार, मुजाबगर, गजड, अल्लेडीलगायत धेरै स्थानमा ठूलो क्षति भएको स्थानीय बासिन्दाले बताएका छन् । बाढीले खोला छेउछाउका घर, पसल र धान उत्पादन राम्रो हुने खेत बगाएको छ । नगरर्नाको कोसेडा खेत बगर बनेको छ । बाढीग्रस्त क्षेत्रमा उद्दारको लागि जिल्ला सदरमुकामबाट नेपाली सेना, सशस्त्र प्रहरी र नेपाल प्रहरी गएका छन् ।
बाढीले गर्दा कैलाश खोलाले बगाएर वेपत्ता भएकाहरु मध्ये वडा नम्बर ५ सैनिबजार बाट बगाएका स्थानिय नन्दु साउदको १० जना परिवार सहित सबैको परिचय खुलिसकेको छ । जसमा बारला निवासी लालसरा शाह र उनका छोरा हिक्मत शाहको २ जना परिवार, चन्दे साउद, बासु साउद र जोगा साउद रहेका रामारोशन गाउँपालिका अध्यक्ष झन्कर बहदुर साउदले जानकारी दिनुभयो । उनिहरु मध्य ६ जनाको शब दर्ना र एक जनाको मंगलसेनको दयाको कैलाश छेउमा फेला परेको हो ।
