उदयपुर, 22 अक्तूबर 2021
उदयपुर जिल्लाको मालपोत कार्यालय कटारीले अनलाइन प्रणाली मार्फत भू–सेवा केन्द्र सुरु गरेको छ । मालपोत कार्यालयबाट हुने जग्गा दर्ता तथा नामसारी अनलाइनबाट नै हुने व्यवस्था कार्यान्वयनमा ल्याईएको हो । मालपोत कार्यालयमा भू–सेवा केन्द्र लागू भएपछि लिखित रुपमा भइरहेको काम भने पूर्ण रुपमा बन्द हुने बताइएको छ । भू–सेवा सञ्चालन भएको अवस्थमा लिखित पास गर्न नपाईने र सबै काम अनलाईनबाट हुने मालपोत कार्यालय कटारीका प्रमुख नेत्रराज भण्डारीले जानकारी दिनुभयो । भू–सेवा केन्द्रको सुरुवातपछि मालपोतको सम्पूर्ण लेखापढी सेन्टर भू–सेवा केन्द्रमा रुपान्तरण हुनेछन् । जग्गासम्बन्धी सम्पूर्ण काम अनलाइन प्रविधिबाट हुने भएकाले भू– सेवा बाट सेवा लिदा सरल र सहज भएको सेवाग्राहीले बताएका छन । भू–सेवा केन्द्रमार्फत हस्तलिखित जग्गाधनीपूर्जा विस्थापित हुने र कार्यलयमा भीडभाड समेत बन्द हुने मालपोत कार्यलय कटारीले जनाएको छ ।
