दिल्ली, 2 फरवरी 2023
भारतको उत्तरप्रदेश स्थित अयोध्यामा बिहीबार एक कार्यक्रमकाबीच देवशिला हस्तान्तरण गरिएको छ । जानकी मन्दिर जनकपुरका महन्थ रामतपेश्वर दास, पूर्वगृहमन्त्री एवं सांसद विमलेन्द्र निधि र हिन्दु स्वयंसेवक संघ नेपालका चालक कल्याण सिंह तिमल्सिनाले कालीगण्डकी नदीबाट देवशिला श्रीरामभूमी तिर्थ क्षेत्र ट्रष्टका महासचिव चम्पत रायलाई हस्तान्तरण गरे ।
कार्यक्रममा बोल्दै पूर्वगृहमन्त्री निधिले अयोध्यामा निर्माण भइरहेको राममन्दिरमा मूर्तिका लागि नेपाल सरकारले कालीगण्डकी नदीबाट शिला निकालेर मूर्ति बनाउन भारतलाई पठाइएको जानकारी दिए ।
अयोध्यामा तीन दशकको विवाद अन्त्य भएर राम मन्दिर बन्दै गर्दा केही वर्षअघि रामको जन्म नेपालमै भएको भनेर गरेको दाबीले दुईदेशको सम्बन्धमा देखिएको समस्या पनि यसले समाधान गरेको निधिले तर्क गरे ।
गण्डकी प्रदेशको १० लाख आर्थिक सहयोगमा कालीगण्डकीको देवशिला जानकी मन्दिर हुँदै अयोध्या ल्याइएको बताउँदै उनले यसले जनकपुर र अयोध्याबीच मात्रै नभई अन्तर्राष्ट्रिय स्तरमा नेपाल भारतको सम्बन्धलाई नयाँ उचाईमा पुर्याएको बताए ।
गत पुस ३ गतेको मन्त्रिपरिषद् बैठकले भारतको अयोध्यामा निर्माण हुने राम मन्दिरमा रामको बालरुपी मुख्य मूर्ति बनाउन कालीगण्डकी नदीका शिला पठाउने निर्णय गरेको थियो ।
त्यसपछि पुस ९ गते बसेको गण्डकी प्रदेश सरकारको बैठकले कालीगण्डकी नदीबाट शिला निकाल्नेदेखि धनुषा पुर्याउँदा सम्मको सम्पूर्ण खर्च व्यहोर्ने निर्णय गरेको र सोहीअनुसार प्रदेश सरकारले शिला खोज्न, उत्खनन गर्न र ढुवानीका लागि भन्दै ९ लाख ९५ हजार रुपैयाँ खर्च गरेको छ ।
म्याग्दीको बेनीस्थित कालीगण्डकी नदीबाट १६ र १८ मेट्रिकटन तौल भएका, सात फिट लम्बाइ, पाँच फिट चौडाई र ३.५ फिट मोटाइका दुईवटा शिला पहिचान गरेर तीन वटा ढुंगाको उमेर एक हजार वर्ष भन्दा पूरानो भएको अध्ययन गरेर पठाइएको थियो ।
यसअघि बुधबार बिहान गोरखपुरस्थित गोरखनाथ मन्दिर परिसरमा विशेष हवन पूजापछि देवशिला अयोध्यातर्फ अगाडी बढाइएको थियो ।
