कपिलवस्तु, 5 अक्टुबर 2021
कपिलवस्तुको कृष्णगनर नगरपालिकामा फैलिएको झाडापखालाको प्रकोपबाट २ जनाको मृत्यु भएको छ । झाडापखालाबाट वडा नंम्बर ९ वहादुरगन्जमा २ जनाको मृत्यु भएको हो । मृत्यु हुनेमा ५ बर्षिय राज कश्यप र ४० बर्षिय राम प्रसाद केवट रहेको जिल्ला स्वास्थ्य कार्यालयका प्रमुख हेमराज पाण्डेयले बताउनुभयो । बालक कश्यपको स्थानीय निजी क्लिनीकमा उपचार गर्ने क्रममा र केवटको घरमै मृत्यु भएको पाण्डेयले बताउनुभयो । नगरपालिकाको वडा नं. ५, ७, ८ र ९ मा प्रकोप फैलिएको उहाँले जानकारी दिनुभयो । प्रकोप रोकथामका लागि जिल्ला स्वास्थ्य कार्यालयको टोली मंगलवार बहादुरगंज पुगेको छ भने प्रदेशबाट उपचार टोली समेत त्यहाँ पुगेको उहाँको भनाई छ । वडा भरि प्रकोप फैलिएपछि शिवराज अस्पताल, निजी क्लिनिक र स्वास्थ्य चौकीमा बिरामीको चाप बढेको जिल्ला स्वास्थ्य कार्यालय कपिलवस्तुका हेल्थ असिस्टेन्ट उमेशचद्र घिमिरेले बताउनुभयो । नगरपालिकाको बहादुरगन्ज, सुखरामपुर, देवानगढिया, जमुनी, दयानगर, विजयनगर, जुमिला, डबरा लगायतका गाउँमा झाडापखाला र बान्ताका बिरामी बढी देखिएका छन् । झाडापखाला के कारण फैलिएको हो भन्ने एकिन कारण पत्ता लागिनसके पनि वर्षायाममा दूषित पानीको कारण झाडापखाला फैलिएको हुनसक्ने डाक्टर मुकेश चौधरीले बताउनुभयो ।
