नयाँ दिल्ली , १७ जनवरी २०२०
नेपाल र भारतका दुई प्रधानमन्त्री भिडियो कन्फ्रेन्सबाट हस्तान्तरण कार्यक्रममा सहभागी हुने छन् । भारतीय सहयोगमा पुनर्निर्माण भएका निजी आवास गृहहरू हस्तान्तरण हुने भएको छ । काठमाडौँ सिंहदरबारमा प्रधानमन्त्री केपी शर्मा ओली र दिल्लीबाट भारतीय प्रधानमन्त्री नरेन्द्र मोदी भिडियो कन्फ्रेन्समा जोडिने छन् ।
कार्यालयका अनुसार २१ जनवरी (७ माघ)मा कार्यक्रमको तयारी भइरहेको छ । भारतले नुवाकोट र गोरखामा कूल ५० हजार निजी आवास निर्माणमा सहयोग गरेको छ । ती घर हस्तान्तरणका लागि दुई प्रधानमन्त्री भिडियो कन्फ्रेन्समा जोडिने तयारी भएको प्रधानमन्त्री कार्यालयका सहसचिव यमलाल भुसालले जानकारी दिए ।
आइसीपीको औपचारिक उद्घाटनका लागि दुई प्रधानमन्त्री भिडियो कन्फ्रेन्समा जोडिनेछन् । सोही बेला भारतीय सहयोगमा निर्माण गरिएका घरको हस्तान्तरण समेत हुनेछ ।
भारतले सहयोग गरेका निजी आवास पुनर्नर्माणको काम ९० प्रतिशतभन्दा माथि पुगेका कारण घर हस्तान्तरण गर्न लागिएको हो । प्रधानमन्त्री केपी शर्मा ओलीले नेपाल चेम्बर्स अफ कमर्शका पदाधिकारीहरुसँगको भेटमा समेत यो सन्दर्भ उल्लेख गरेका थिए ।
‘गोरखामा भारतीय सहयोगमा बनाएका घरहरुको हस्तान्तरण गर्दैछौं, यहाँ सिंहदरबारबाट मैले र दिल्लीबाट मोदीजीले उद्घाटन गर्दैछौं,’ उनले भनेको थिए ।
भारतीय सहयोगमा गोरखामा मात्र २७ हजार घरको पुनर्निर्माण भएको छ । निजी आवास पुनर्निर्माणतर्फ भारत सरकारले ‘नेपाल आवास पुनर्निर्माण परियोजना’मा लगानी गरेको हो ।
