रामेछाप , १८ जनवरी २०२०
नेपाली कांग्रेसका केन्द्रीय सदस्य प्रदीप पौडेलले कांग्रेस बलियो प्रतिपक्षी बन्न नसक्नुको कारण पार्टीभीत्रको गुटबन्दी भएको बताएका छन् । गुटबन्दीका कारण पार्टी कमजोर भएको छ त्यसकारण एकजुट हुनपर्ने आग्रह गरेका छन् ।
‘कांग्रेसका नेता कुनै एक गुटको अभिभावक भएर अहिलेको कम्युनिस्टविरुद्ध लड्न सकिँदैन,’ प्रेस युनियन रामेछापले शनिबार मन्थलीमा गरेको पत्रकार भेटघाट कार्यक्रममा पौडेलले भने, ‘कम्युनिस्टविरुद्ध लड्ने हो भने पहिले पार्टीलाई बलियो बनाउनुपर्छ ।’
अहिलेको सरकार इतिहासकै भ्रष्ट भएको दाबी पनि उनले गरे । ‘सरकारले भ्रष्टाचारलाई संस्थागत रूपमै सरक्षण गरेको छ,’ नेता पौडेलले भने ।
सरकारले बहुमतको डण्डा लगाएर संविधानलाई लत्याउने काम गरेको भन्दै उनले सरकारी रवैयाप्रति आक्रोसमेत पोखे । नागरिकको स्वतन्त्रता खोस्ने गरी तयार पारिएको सूचना प्रविधि विधेयक त्यसकै कडी भएको उनको भनाइ छ ।
