धनुषा, 18 जुलाई
राम जन्मभूमि अयोध्याबारेको बयानको विरोध गर्दै जनकपुरमा प्रधानमन्त्री केपी शर्मा ओलीविरुद्ध शनिवार हिन्दू संघ-संगठनहरुले जनकपुरमा प्रदर्शन गरेका छन । साधुसन्तसहित हिन्दू युवा परिषद् नेपाल, विश्व हिन्दू परिषद, हिन्दू परिषद नेपाल, रामानन्दीय वैष्णव संघलगायत संगठन जनकपुरको रामानन्द चोकमा जम्मा भएर नगर परिक्रमा गरेका हुन ।
प्रदर्शनमा भेला भएका साधुसन्तहरुले ‘धर्म र आस्थामाथिको राजनीति बन्द गर’, ‘हिन्दुत्वता नै राष्ट्रियता हो’, ‘धर्म निरपेक्षता मुर्दाबाद’, ‘तथ्यहीन विवाद बन्द गर’, ‘केपी ओली मुर्दाबाद’लगायतका नारा लगाएका थिए ।
भानु जयन्तीको अवसरमा बालुवाटारमा आयोजित एक कार्यक्रममा प्रधानमन्त्री ओलीले सीताको विवाह भएको अयोध्या भारतमा नभइ नेपालकै पर्साको ठोरीमा रहेको भन्दै भारतले नक्कली अयोध्या खडा गरेर नेपालमाथि सांस्कृतिक आक्रमण गरेको बताउनुभएको थियो ।
प्रधानमन्त्री ओलीले राम जन्मस्थल सम्बन्धमा विवादित बयान दिएपछि नेपाल–भारतमा त्यसको आलोचना भइरहेको छ ।
