दार्जीलिङ, 22 जनवरी/ कयेश अंसारी
नागरिकता संशोधन कानून (CAA), आसाम सरकारले लागु गरेको राष्ट्रीय नागरिकता पंजीकरण (NRC) र नागरिकता जनसंख्या पंजीकरण (NPR) को विरोध गर्न दार्जीलिङ पुग्नु भएको पश्चिम बंगालकी मुख्यमन्त्री ममता बनर्जीलाई व्यापक जनसमर्थन मिलेको छ । दार्जीलिङको 3 दिने भ्रमणमा रहनु भएकी मुख्यमन्त्री बनर्जीले आज गरेको रैली प्रदर्शनमा हजारौको संख्यामा मानिसहरुको उपस्थिति रहेको थियो । विभिन्न साँस्कृतिक पोशाकमा रहेका मानिसहरुलाई मुख्यमन्त्रीले आफु रहेसम्म कसैले डराउनु पर्ने आवश्यकता नरहेको बताउनुभयो । रैली शुरु हुनुअघि दार्जीलिङ र कालिमपोङमा CAA र NRC लागु हुन नदिने भन्दै शपथ ग्रहण गरिएको थियो । शपथ ग्रहण समारोहमा टीएमसी, बिनय खेमाको गोर्खा जनमुक्ति मोर्चा, विभिन्न विकास बोर्ड र समूदायहरुले भाग लिएका थिए । मोटर स्टेशनमा पुगेर सभामा परिणत भएको रैलीमा बोल्दै मुख्यमन्त्री बनर्जीले CAA विरुद्ध दार्जीलिङ पहाडको आवाज देशका अन्य भागमा पुग्नुपर्ने र पहाड बीजेपीसँग लड्न तयार हुनुपर्ने बताउनुभयो । उहाँले गोर्खा वा अन्य समूदाय देशका नागरिक भएकाले कसैले डराउन नपर्ने भन्नु भयो । उहाँले NRC को त्रासमा रहेको पश्चिम बंगालमा 30 भन्दा धेरैले आत्महत्या गरेको पनि बताउनुभयो । उहाँले यद्धपी आफुलाई दार्जीलिङबाट भोट नपाईए पनि आफु यहाँ उत्पन्न खतरनाक स्थितिमा उनिहरुको साथमा रहेको बताउनुभयो । उहाँले NPR का लागि आवश्यक आमा-बुवाको जन्ममिति आफुले पनि उपलब्ध गराउन नसक्ने भन्नुभयो । उहाँले बीजेपीले देशको अर्थव्यवस्था, रोजगारी, किसान समस्या जस्ता समस्यामा ध्यान नदिएको पनि आरोप लगाउनुभयो । मुख्यमन्त्रीले NRC र CAA फिर्ता नभएसम्म आन्दोलन जारी राख्न आग्रह समेत गर्नुभयो । भानु भवनबाट निस्केको रैली टाउनको परिक्रमा गर्दै मोटर स्टेशनमा पुगेर सभामा परिणत भएको थियो । उहाँले बिहीवार दार्जीलिङको मलमा आयोजित हुने नेताजी सुभाष चन्द्र बोसको जन्मजयन्ती समारोहमा पनि सहभागिता जनाउनु हुनेछ।