काठमाडौं,२० जनवरी २०२०
उपसभामुख डा. शिवमाया तुम्बाहाङफेले राजीनामा दिएकी छन् । कम्युनिस्ट पार्टी (नेकपा)ले सभामुखमा अगिन सापकोटालाई उम्मेदवार बनाउने निर्णय गरेको भोलिपल्ट संसद बैठक राखेर तुम्बाहङ्फले राजीनामा दिने घोषणा गरेकी हुन् ।
‘प्रतिनिधिसभामा बहुमत प्राप्त दलले प्रतिनिधिसभामा नेतृत्वको दावा गरेको अवस्थामा सहजिकरणका लागि मैले मार्गप्रशस्त गर्ने निष्कर्षमा पुगेको व्यहोरा सम्मानित सदन समक्ष निवेदन गर्न चाहन्छु ।’ लगतै संसद सचिवालयमा राजीनामा पत्र दर्ता गराएकी छन् ।
तत्कालीन सभामुख कृष्णबहादुर महराले राजीनामा दिएपछि तुम्बाहाङफेले सभामुखमा दाबी गरेकी थिइन् ।
सोमबार उपसभामुखबाट राजीनामा दिँदा पनि उनले सभामुखमा आफ्नो दाबी स्वभाविक भएको बताइन् । मेरा धारणाहरु कुनै अस्वभाविक महत्वकांक्षा या अनुचित आग्रहबाट प्रेरित थिएनन् भन्ने कुरामा म दृढ छु’ उनले भनिन् । आफ्नो दाबीबारे आएको प्रतिक्रियालाई नजिकबाट नियालिरहेको भन्दै उनले यसबारे समयले वस्तुनिष्ठ मुल्यांकन गर्ने विश्वास व्यक्त गरिन् ।