नयाँ दिल्ली, 25 जुन 2020, खुम गुरुङ
दिल्लीका मनकारी गुरुङ र आमा समूहले रोगका कारण थला परेर पारिवारको भरण-पोषण गर्न असमर्थ भएका एक परिवारलाई खाद्यान्न सहयोग गरेको छ । लकडाउन अघिदेखि टीबी र कलेजोको संक्रमणले ग्रस्त भएर बीएल कपुर अस्पतालमा उपचार गराइरहेका 43 वर्षीय गोविन्द गुरुङको परिवारलाई गुरुङ समूदाय र विशेषगरि आमा समूहको पहलमा परिवारलाई 3 बोरी चामल, 10 किलो आँटा, 5 किलो दाल, 5 किलो तेल, 4 किलो चिनी, 1 किलो नून, 1 किलो चियापत्ति लगायत 11 हजार 8 सय रुपैयाँ नगद हस्तान्तरण गरेको हो । जानकारीका अनुसार स्याङजाको वालिङ नगरपालिका, वडा नम्बर 3 सिगरकोट स्थायी घर भइ दिल्लीको करोलबागमा बस्दै आएका गोविन्द गुरुङ विरामी हुनुअघिनै उनकी पत्नीले नगद र गहना लगेर फरार भएकी थिइन । गुरुङका 3 छोरीहरु भएको र आफु पनि रोगले ग्रस्त भएकाले उनलाई आर्थिक समस्या भएको थियो । त्यसपछि वालिङ नगरपालिकाका मनकारी गुरुङ र आमा समूहले हिजो खाद्यान्न र आर्थिक सहयोग गरेको हो । यसअघि सोही परिवारलाई पहिलो पटक मेरी गुरुङको नेतृत्वमा पर्वत समाजले राहत सहयोग गरेको थियो ।
अर्को तर्फ मनकारी गुरुङ र आमा समूहले दुर्घटनामा परेर खुट्टा फ्याक्चर भएर समस्यामा परेका प्युठान घर भएर दिल्लीको मुखर्जी नगरमा बसोबास गर्दै आएका यम बहादुर गुरुङलाई 1 बोरी चामल र 5 हजार नगद सहयोग गरेको छ । यम बहादुर कामका लागि राजस्थान गएका बेला गत 12 मई 2020 मा बलेरो गाडीको ठक्करले घाइते भएका थिए । यद्धपी उनलाई दुर्घटनामा क्षतिपूर्ति पाइएपनि लकडाउनका कारण उनलाई समस्या थपिएको थियो ।
