नयाँ दिल्ली, 25 अप्रिल 2021
भारतको राजधानी दिल्लीमा लगाइएको लकडाउन थप एक साताका लागि बढाइएको छ । कोरोनाभाइरस संक्रमित बढ्ने क्रम नरोकिएपछि आइतबार दिल्लीका मुख्यमन्त्री अरबिन्द केजरीवालले एक हप्ताका लागि लकडाउन बढाउने घोषणा गरेका हुन् । दिल्लीमा लागू गरिएको लकडाउन सोमवार विहानबाट सकिदै थियो । गत साताको सोमबार एक हप्ताका लागि गरिएको लकडाउन कोरोना संक्रमण नियन्त्रणमा नआएपछि पुनः एक साता थप गरिएको हो । अक्सिनजको अभावका कारण सो क्षेत्रका कोरोना संक्रमितहरुले निक्कै सास्ती बेहोर्नु परिरहेको छ ।
दिल्लीमा कोरोना संक्रमणको दर करिब ३७ प्रतिशत पुगेको छ । केही स्थानमा अक्सिजन आपूर्ति गर्न नसकिएको स्वीकार गर्दै केजरीवालले केही दिनभित्रै अवस्था नियन्त्रणमा आउने दाबी गरे । दिल्लीमा दैनिक ७०० टन अक्सिजन आवश्यक पर्ने भए पनि अधिकतम ३३५ टन मात्र उपलब्ध भएको बताइएको छ ।
भारतमा एक दिनमा ३ लाख ४९ हजार ६९१ नयाँ संक्रमित थपिएसँगै कोरोना संक्रमितको संख्या १ करोड ६९ लाख ६० हजार १७२ पुगेको छ । केन्द्रीय स्वास्थ्य मन्त्रालयका अनुसार आइतवार विहान २ हजार ७६७ जनाको कोरोना संक्रमणबाट मृत्यु भएपछि भारतमा मृत्यु हुनेको संख्या १ लाख ९२ हजार ३११ पुगेको छ ।
