नयाँ दिल्ली/ 2 मार्च
भारतमा रहेका प्रवासी नेपालीहरुको नागरिकताको आधारमा बैंक खाता खोल्नुपर्ने विषयमा हिजो दिल्लीमा एक अन्तर्रक्रिया कार्यक्रम गरिएको छ । नेपाली जनसम्पर्क समिति भारतको आयोजनामा दिल्लीको आईटीओमा गरिएको कार्यक्रममा नेपाली नागरिकताकै आधारमा बैंक खाता खोलिनुपर्ने वक्ताहरुले बताएका छन ।
नेपाल एसबीआईका उच्चस्तरीय प्रतिनिधिमण्डलका साथै भारतीय स्टेट बैंकका शीर्ष अधिकारीहरु पनि उपस्थित रहेको कार्यक्रममा नेपाली नागरिकता आधारमा बैंक खाता खोल्नका लागि दिल्लीस्थित नेपाली दूतावास र भारतीय बैंकको समन्वयमा पहलहरु भरहेको बताइएको थियो ।
नेपाली नागरिकताको डिजीलिकरण नभएकाले नागरिकताको आधारमा अहिलेनै खाता खोल्न सहज नभए पनि नेपाली दूतावाससँग त्यसको विकल्पमा प्रयासहरु भइरहेको नेपाल एसबीआईका प्रवन्ध निर्देशक अनुकुल भटनागरले बताउनुभयो । भारतबाट पनि ठूलो परिमाणमा रेमिट्यान्स जाने भए पनि सरल रुपमा नेपाल नपुग्ने भएकाले भारतमा एसबीआई बैंकमा खाताहरु खोलिए सस्तो दरमा पैँसा घर पुग्ने र त्यो उत्पादनमूलक काममा प्रयोग हुने बताईएको थियो । नेजस भारतका अध्यक्ष बालकृष्ण पाण्डेको प्रमुख आतिथ्यमा भएको कार्यक्रममा ठूलो संख्यामा प्रवासी नेपालीहरुको उपस्थिति रहेको थियो ।
समारोहमा बोल्दै अध्यक्ष पाण्डेले अहिले दोहोरो नागरिकताको विषयले नेपालीहरु मर्कामा परिरहेको अवस्थामा नेपाली नागरिकतामै खाता खोलिने व्यवस्था भए दोहोरो नागरिकता समस्या समाधान हुने बताउनुभयो ।
अन्तरक्रियाको अध्यक्षता नेपाली जनसम्पर्क समिती उत्तर भारत क्षेत्रकी अध्यक्षा सुनिता जीसी कुँवरले गर्नुभएको थियो । त्यसअघि नेजस भारतको प्रशिक्षण कार्यक्रम पनि सोही स्थानमा भएको थियो ।
