गुल्मी, 20 मई 2020
नेपालमा कोरोना भाइरसका कारण तेस्रो व्यक्तिको मृत्यु भएको छ। गुल्मीका संक्रमित पुरुषको बुधबार मृत्यु भएको प्रदेश-5 का सामाजिक विकास मन्त्री सुदर्शन बरालले जानकारी दिनुभयो। योसँगै नेपालमा कोरोनाबाट मृत्यु हुनेको संख्या 3 पुगेको छ।
सोमबार कोरोना संक्रमण पुष्टि भएका उनलाई रुपन्देहीको तिलोत्तमास्थित क्रिमसन अस्पतालमा भर्ना गरिएको थियो। गुल्मीको मदाने गाउँपालिका पुर्कोट घर भएका उनि गत जेठ 1 गते ज्वरो आउने र रुघाखोकी लाग्ने भएपछि अस्पतालमा भर्ना भएका थिए। भर्ना भएको दिनदेखिनै भेन्टिलेटरको सहायतामा आइसीयूमा उनको उपचार भइरहको थियो। मृतक पेशाले शिक्षक थिए। उनको विद्यालय क्वारेन्टिन सेन्टर भएकाले त्यहीँबाट उनलाई कोरोना भाइरसको संक्रमण भएको आशंका गरिएको छ।
नेपालमा यसअघि पनि दुई जना व्यक्तिको कोरोनाबाट मृत्यु भएको थियो। जसमा सिन्धुपाल्चोककी 29 वर्षीया सुत्केरी महिला र बाँकेका 25 वर्षीय पुरूष रहेका छन्।
