25 सितम्बर 2021
नेपाली दूतावासले मलेसियामा बसेका नेपालीहरुलाई अवैध भएर नबस्न आग्रह गरेको छ । बिदेशी कामदारलाई दिएको मौका ‘रिक्यालिब्रेशन’ कार्यक्रम डिसेम्बरको अन्त्यसम्म जारी रहेकाले त्यसबेलासम्म आवश्यक कागजात मिलाएर बैधानिक बाटो समाएर स्वदेश फर्कन दूतावासले आग्रह गरेको हो । नेपाली दूतावासका द्धितिय सचिवका अनुसार रिक्यालिब्रेशन अन्तर्गत मलेसियाले गैरकानुनीरुपमा बसेका नेपाली कामदारलाई स्वदेश फर्कनाका लागि त्यहाँको सरकारले दुई वटा बिकल्प दिएको छ । पहिलो बिकल्पमा गैरकानुनी नेपालीले कि त निश्चित प्रक्रिया पूरा गरेर मलेसियामै कानुनी भइ काम गर्न सक्नेछन् । दोस्रो सहुलियत दरको जरिबाना तिरेर सहज रुपमा आफ्नो देश फर्कन सक्ने द्धितिय सचिवले बताए । बैध कागजात नहुँदा धेरै नेपाली कामदार जेल पर्ने गरेको पाइएको र समयमै मलेसिया सरकारले प्रदान गरेको अवसरको फाइदा लिन आग्रह गरेका छन् । स्वदेश फर्कने गैरकानुनी रुपमा नेपालीले राहदानी वा ट्राभल डकुमेन्ट र हवाई टिकट लिएर सीधै विमानस्थल जान सकिने र त्यहाँको इमिग्रेशनबाट चेक आउट मेमो लिएर घर जान सकिने सचिवले जनाए । नगद कारोबार नहुने भएकोले अध्यागमन बिभागमा तिर्नुपर्ने जरिवाना ५ सय रिङगेट क्रेडिट कार्ड, डेबिट कार्ड वा टच एन्ड गो कार्डबाट तिर्नु पर्नेछ । पासपोर्ट नभएको हकमा यात्रा अनुमतिपत्र बनाउनका लागि दूतावासमा नागरिकताको प्रतिलिपि, पुरानो पासपोर्टको प्रतिलिपि, पासपोर्ट साइजको दुई प्रति रंगिन फोटो र १६० मलेसियन रिंगेट दस्तुर तिरी ट्राभल डकुमेन्ट बनाएर पनि स्वदेश फर्किन सकिने उनले जनाएका छन ।
