काठमाडौं, १ फेब्रुअरी
चीनमा कोराना भाइरसको संक्रमण फैलिएपछि नेपालका महत्वपूर्ण विकास आयोजनामा समेत त्यसको प्रभाव देखिन थालेको छ । विभिन्न विकास आयोजनामा कार्यरत चिनियाँ परमर्शदाता, ठेकेदार, व्यवस्थापक र कामदार नयाँ वर्ष मनाउन चीन गएपछि नेपाल फर्किएका छैनन् ।
नयाँ वर्ष मनाउन धेरै चिनियाँ प्राविधिक, कामदार र व्यवस्थापकहरु घर गएका बेला त्यहाँ कोरोना भाइरसको संक्रमण फैलिएको छ । चीनमा कतिपय प्रान्तले अर्को प्रान्तमा हुने आवतजावतमा कडाइ गरेपछि त्यहाँ पुगेका कामदार नेपाल आउन समस्या भएको हो ।
यसले केही महत्वपूर्ण आयोजनाहरु प्रति प्रभावित हुने डर पैदा भएको सरकारी अधिकारीहरुले बताएका छन् ।
झन् चिनियाँ नागरिकसँगै कोरोना भाइरस फैलिने डर रहेकाले पनि चिनियाँ कामदरको नेतृत्वमा काम भइरहेका आयोजनाहरुमा अन्योलको वातावरण सिर्जाना भएको छ ।
नेपाल नागरिक उड्ययन प्राधिकरणका निर्देशक प्रदीप अधिकारीका अनुसार पोखरा र भैरहवा विमानस्थलमा कार्यरत आधाभन्दा बढी चिनियाँ कामदार नयाँ वर्ष मनाउन चीन पुगेका छन् ।
केही आयोजनामा सीमित चिनियाँ प्राविधिकहरु भएपनि कतिपय आयोजनामा उनीहरुको बर्चस्व छ । यस्ता कामदारहरु कहिले फर्किन्छन् र यहाँ कामको गति बढ्छ भन्ने अन्योल भएको छ ।
नेपाल र चीनबीच हिमालय सीमापार रेल्वे लाइन निर्माणको विस्तृत सम्भाव्यता अध्ययनसहित परियोजना प्रतिवेदन (डीपीआर) निर्माणका लागि चिनियाँ टोली नयाँ वर्ष मनाएर नेपाल आउने कार्यक्रम थियो । तर, अब कोरोनाको संक्रमणले तुरुन्तै चिनियाँ टोली नेपाल आउन नसक्ने बताइएको छ ।
