काठमाण्डौ, 29 जनवरी 2021
प्रधानमन्त्री केपी शर्मा ओलीले लैनचौर स्थित शहीद स्मारकमा पुगेर शहीदहरुलाई श्रद्धाञ्जली अर्पण गर्नुभएको छ । माघ १६ गते (आज) शहीद दिवसको अवसर परेर प्रधानमन्त्री केपी शर्मा ओलीले लैनचौर स्थित शहीद स्मारकमा आयोजित विशेष कार्यक्रमकाबीच शहीदहरु प्रति श्रद्धाञ्जली अर्पण गर्नुभएको हो । सो अवसरमा प्रधानमन्त्री ओलीले विभिन्न कालखण्डमा देशको रक्षाको निम्ति जीवन दिने अमर शहीदहरुले बलिदानको त्यागको श्रेष्ठता देखाउनुभएको र त्यो अतुलनिय भएको बताउनुभयो । शहीदका योदानसँग बाँचेका मानिसहरुको कुनैपनि योगदान तुलाना हुन नसक्ने पनि प्रधानमन्त्री ओलीले बताउनुभयो । अहिले जुन उपलब्धी, सफलता र उचाई प्राप्त भएको छ ती सबै कुराको पछाडी शहीदको बलिदानले काम गरेको पनि उहाँको भनाई छ । शहीदहरु सबैका साझा भएकोले शहीदको बलिदानबाट प्राप्त भएका उपलब्धीहरु समेत सबैको साझा भएको बताउनुभयो । शहीदको बलिदानीबाट प्राप्त भएका उपलब्धीहरुको रक्षा गर्ने, सुदृढ गर्ने र अगाडि बढाई शहीदका सपना पुरा गर्ने जिम्मेवारी अहिलेको र आगामी पुस्ताको भएको पनि बताउनुभयो ।
शहीदको बलिदानीपूर्ण संघर्षको मार्गदर्शनबाट समृद्ध नेपाल निर्माण गरी जनतालाई सुखी बनाउँदै राष्ट्रिय आकांक्षा पूरा गर्ने तर्फ सरकार अग्रसर रहेको पनि प्रधानमन्त्री ओलीले बताउनुभयो । शहीद दिवसको अवसरमा शुक्रबार काठमाडौं महानगरपालिकाको संयोजनमा शान्तिवाटिकाबाट लैनचौर स्थित शहीद स्मारकसम्म प्रभातफेरी आयोजना गरिएको थियो । कार्यक्रममा उपप्रधानमन्त्री इश्वर पोखरेल, गृहमन्त्री रामबहादुर थापा लगायत विभिन्न मन्त्रीहरुको पनि उपस्थिति रहेको थियो ।
