काठमाडौं, 20 मार्च 2023

नेकपा माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल प्रचण्डले प्रतिनिधिसभाबाट विश्वासको मत पाएका छन् । सोमबार सभामुख देवराज घिमिरेले प्रधानमन्त्रीको विश्वासको मतसम्बन्धी प्रस्ताव निर्णयार्थ प्रस्तुत गरेपछि भएको मत विभाजनमा प्रधानमन्त्रीलाई विश्वासको मत रहेको सम्बन्धी प्रस्तावको पक्षमा बहमुत प्राप्त भएको हो ।  प्रचण्डलाई विश्वासको मत रहेको पक्षमा 172 जना सांसदको मत पर्यो यस्तै 89 सांसदले प्रधानमन्त्रीलाई विश्वासको मत नरहेको पक्षमा मतदान गरे । यस्तै एक सांसद तटस्थ रहे ।  प्रतिनिधिसभामा भएको मतदानमा कुल 262 सांसद उपस्थित थिए ।  यसअघि प्रचण्डले पुस 26 मा पहिलो पटक विश्वासको मत लिएका थिए । त्यतिबेला उनले  268 सांसदको मत पाएका थिए। यस्तै दुई सांसदले विपक्षमा मत दिएका थिए । यो बीचमा एमाले र राप्रपाले सरकारलाई दिएको समर्थन फिर्ता लिएसँगै प्रचण्डले फेरि विश्वासको मत लिनु परेको हो। दोस्रो पटक विश्वासको मत लिँदा प्रचण्डलाई एमाले, राप्रपा र नेमकिपाबाहेकका दलले विश्वासको मत दिए । राष्ट्रपति निर्वाचनमा माओवादी केन्द्रले कांग्रेसलाई सघाएपछि पुस 10 मा बनेको एमाले–माओवादीसहित 7 दलको सत्ता गठबन्धन भत्किएको थियो । प्रचण्डले विश्वासको मत पाएसँगै पुस 10 अघिको तत्कालीन सत्ता गठबन्धन औपचारिक रुपमै फेरि ब्युतिन पुगेको छ । प्रचण्ड गत पुस 10 गते प्रधानमन्त्री नियुक्त भएका थिए ।