काठमाण्डौ, 24 अगस्त 2021
माधव कुमार नेपाल समर्थक नेता झलनाथ खनालले नेकपा एकीकृत समाजवादी पार्टीको बैठकलाई सम्बोधन गर्नुभएको छ। बैठकलाई सम्बोधन गर्दै भारतको नयाँ दिल्लीमा उपचाररत नेता खनालले नयाँ पार्टी निर्माणका लागि विद्रोह गरेको भन्दै पार्टीलाई अनुशासित, एक ढिक्का र सामूहिक ढङ्गले अगाडि बढाउनुपर्ने बताउनुभएको छ। उहाँले चन्द्रागिरि रिसोर्टमा जारी सो पार्टीको केन्द्रीय समिति बैठकलाई मंगलबार भर्चुअल रूपमा सम्बोधन गर्नु भएको हो। खनालले नयाँ क्रान्तिकारी पार्टी अघि बढाउन ठुलो चुनौतीसंगै सम्भावना पनि रहेको बताउनुभयो। खनालले आम नेता कार्यकर्ताले केपी ओलीको दमन र दक्षिणपन्थी अवसरवाद नबिर्सिएको भन्दै पार्टीको वैचारिक क्रान्तिकारी दिशा महत्त्वपूर्ण हुने र त्यसैले पार्टीको दिशा तय गर्ने बताउनुभयो। अस्पतालबाट बोल्दै खनालले नेपालमा रहेका नेताहरूलाई सबैभन्दा पहिला पार्टी दर्ता गर्न सुझाव पनि दिनुभएको छ। खनालले पहिला पार्टी दर्ता गर्नुपर्ने र त्यसपछि पार्टीका नीति सिद्धान्त अपडेट गर्नुपर्ने पर्ने पनि सुझाव दिनुभयो। उहाँले दक्षिणपन्थी अवसरवादमाथि दरिलो हमला गर्नुपर्ने भन्दै त्यति नै क्रान्तिकारी मार्क्सवादको विकास गर्न सकिने बताउनुभएको छ। आफूहरूसँग सशक्त वैचारिक क्रान्तिकारी शक्ति निर्माण गर्नसक्ने क्षमता रहेको भन्दै त्यो शक्तिले ठुलो परिवर्तनको महसुस गर्न सकिने खनालको भनाई छ। नयाँ दिल्लीमा उपचाररत नेता खनालले जनवादी क्रान्ति पुरा गरिसकेको भन्दै जबजको युग सकिएको समेत बताउनुभयो।
