काठमाडौं, 29 मार्च 2023

प्रधानमन्त्री पुष्पकमल दाहाल प्रचण्डले आफ्नो नेतृत्वको सरकार पाँचै वर्ष चल्ने दाबी गरेका छन्।बुधबार काठमाडौँ महानगरपालिकाले प्रज्ञा प्रतिष्ठानको हलमा गरेको न्यायिक समिति पहिलो राष्ट्रिय सम्मेलनमा बोल्दै प्रचण्डले यस्तो बताएका हुन्।

प्रधानमन्त्रीले भने, ‘बालेनजीले आफ्नो कुरा राख्दै गर्दा सरकारको निरन्तरताको कुरा गर्नुभयो। स्थानीय तहको निर्वाचनपछि प्रदेश र संघको निर्वाचन सम्पन्न गर्‍यौं। त्यसपछि सरकार निरन्तर एउटै छ। मेरो नेतृत्वमा सरकार छ। मलाई विश्वास छ, यो सरकार पाँच वर्षसम्म जान्छ।’

बुधबार न्यायिक समितिको पहिलो राष्ट्रिय सम्मेलनलाई सम्बोधन गर्दै उनले काठमाडौंका प्रमुख बालेन शाहले सरकार फेरबदल भइरहँदा स्थानीय तहलाई पनि काम गर्न कठिनाइ हुने गरेको भनाइको जवाफ दिँदै सरकार पाँच वर्ष नै टिक्नेमा ढुक्क हुन आग्रह गरे ।

उनले आफूले नै नेतृत्व गरेको आन्दोलनको बलमा तीन तहको सरकार बनेको दाबी गरे। स्थानीय तहको दोस्रो कार्यकालका लागि निर्वाचन सम्पन्न भइसक्दा आफूलाई खुसी लागेको बताउँदै प्रधानमन्त्री प्रचण्डले जग बलियो भयो भने सम्पूर्ण परिवर्तनको प्रक्रिया सुदृढ हुने धारणा राखे।