काठमाडौं, 17 अक्टूबर 2022
नेपाली कांग्रेसका नेता प्रकाशमान सिंहले संविधानको रक्षा र त्यसको अक्षरशः कार्यान्वयनका लागि सत्ता गठबन्धनलाई मतदान गर्न आग्रह गरेका छन् । उनले संघीय संविधान जारी भएको यतिका वर्ष बित्दा पनि संविधानका मुलभूत मुद्दाहरूमै सरकारले प्रदेश र स्थानीय सरकारहरूलाई अधिकार दिन नसकेको बताए । काठमाडौं क्षेत्र नं. १ बाट प्रतिनिधिसभा सदस्यका उम्मेदवार नेता सिंहले सोमबार काठमाडौंमा पत्रकार सम्मेलनमार्फत प्रतिबद्धतापत्र सार्वजनिक गर्दै आसन्न निर्वाचनले संविधानका उपलब्धिहरूको रक्षा र कार्यान्वयनका लागि सत्ता गठबन्धन दलको जित महत्त्वपूर्ण हुने बताए ।
‘संविधान जारी भएको यतिका वर्ष भयो । तर, संघीयतामाथि नै प्रश्न उठिरहेको छ । संघीय सरकारले अधिकार दिन नचाहँदा र आवश्यक कानुनहरू बन्न नसक्दा संघीयताबारे प्रश्न उठ्नु स्वभाविक छ,’ नेता सिंहले भने, ‘नेपाली कांग्रेस सिंहदरबारमा केन्द्रित अधिकार वडा-वडासम्म पुर्याउन चाहन्छ । त्यसका लागि यो संविधानको कार्यान्वयन हुनु जरुरी छ ।’
उनले निर्वाचनपछि बन्ने कांग्रेसको सरकारले प्रदेश र स्थानीय तहलाई हस्तान्तरण गर्ने प्रतिबद्धतासमेत जनाए । नेता सिंहले आफू काठमाडौंबाट निर्वाचित भएर नेपाल सरकारको उपप्रधानमन्त्रीसम्म बनेको भन्दै त्यसमार्फत कांग्रेसले क्षेत्र नं. १ का जनतालाई गरेको सम्मानको रुपमा बुझ्नुपर्ने बताए ।
उनले विगत पाँच वर्षसम्म कांग्रेसको सरकार नरहेका कारण कतिपय योजनामा रहेका कामहरूसमेत हुन नसकेको भन्दै आसन्न चुनावमा निर्वाचित भए आफूलाई काम गर्ने वातावरण बन्न सक्ने बताए ।
