काठमाण्डौं, 28 जनवरी 2021
देशभक्त जनगणतान्त्रीक मोर्चा नेपालले कार्टुन प्रदर्शनी मार्फत सरकारको विरोध गरेको छ । बिहीबार काठमाडौंको रत्नपार्क स्थित शान्तिवाटिकामा पछिल्लो राजनीतिक घटनाक्रमलाई व्यङ्ग्य गर्दै तयार पारिएका विभिन्न कार्टुन मार्फत सरकारको विरोध गरेको हो । मोर्चाका संयोजक सिपी गजुरेलले संसदीय पार्टीका नेताहरुको चरित्र र अहिलेको गणतन्त्रलाई कार्टुन मार्फत देखाइएको बताउनुभयो । यस्तै पछिल्लो राजनीतिक घटनाक्रमबाट अन्योलमा परेका जनतालाई बुझाउन पनि कार्टुन प्रदर्शनी गरिएको बताउनुभयो । प्रदर्शनीमा राखिएका कार्टुनहरुले देशमा परिवर्तन आउन नसकेको, राष्ट्रिय स्वाधिनताको रक्षा हुन नसकेको, देशको विकास र समृद्धि हुन नसकेको र रोजगारी पाउन नसकेर अन्योलमा परेका नागरिकहरुलाई समेत देखाइएको संयोजक गजुरेलले बताउनुभयो । कार्टुनमार्फत अन्योलमा परेका जनतालाई अहिलेको राजनीतिक दलहरुले कुनै निकास दिन नसक्ने सन्देश दिन खोजिएको पनि संयोजक गजुरेलले प्रष्ट पार्नुभयो ।
अहिलेको व्यवस्थाले जनतालाई निकास नदिने भएकाले अव नयाँ परिवर्तन ल्याउन नयाँ विकल्पको खोजि गर्नुपर्ने पनि संयोजक गजुरेलले बताउनुभयो । देशमा संघीय जनगणतन्त्र ल्याउनुपर्ने कुरालाई पनि कार्टुनमार्फत देखाउन खोजिएको उहाँको भनाई छ ।
