काठमाडौ, 6 नवम्बर 2021
रानीपोखरीस्थित बालगोपालेश्वर मन्दिरमा भाइटिका लगाइएको छ । तिहार अर्थात यमपञ्चकको पाँचौ दिन शनिबार भाइटीका लगाइएको हो । भाइटिकाको अवसरमा काठमाडौंको रानीपोखरीस्थित बालगोपालेश्वर मन्दिरमा शनिबार बिहानैदेखि भाइटीका लगाउन सुरु गरिएको थियो । यस वर्ष पनि मन्दिर खुला भएकोले बिहानैदेखि व्यवस्थित रुपमा टीका लगाइएको हो । बालगोपालेश्वर मन्दिरमा भाइटिका लगाउन सर्वसाधारणको भीड लागेको थियो । तिहारको भाइटिकामा मात्रै खुल्ने यो मन्दिरमा आफ्ना दाजुभाइ नभएका दिदिबहिनी तथा दिदीबहिनी नभएका दाजुभाइहरुले भाइटीकाका दिन मन्दिरमा गई पूजा, दर्शन गरी टीका लगाउने गर्दछन् । भुकम्पपछि पूननिर्माण गरिएको रानीपोखरीभित्रको बालगोपालेश्वर मन्दिरमा भाइटिका लगाउन झनै राम्रो सुविधा पाइएको टिका लगाउन पुगेका सर्वसाधारणले बताएकाछन् । विसं २०३५ पछि नियमितरुपमा रानीपोखरीभित्रको बालगोपालेश्वर मन्दिर खुल्न थालेको हो । बालगोपालेश्वर मन्दिर भूकम्पपछि गत वर्षदेखि मात्र भक्तजनका लागि पुनः खुला गरिएको हो ।
