नयाँ दिल्ली/ 2 मार्च
रुसको मस्कोमा सम्पन्न मस्को स्टार्स इन्टरनेशनल जुनियर वुशु प्रतियोगितामा भारतका लागि 3 स्वर्ण जितेकी नेपालकी छोरी रेजिना तामाङलाई दिल्ली विमानस्थलमा भव्य स्वागत गरिएको छ । मस्कोमा 24 देखि 28 फरवरीसम्म चलेको प्रतियोगितामा 3 स्वर्ण जितेकी रेजिनाको स्वागतका लागि गए राति ठूलो संख्यामा प्रवासी नेपाली र भारतीय नागरिकहरु विमानस्थल पुगेका थिए।
सो प्रतियोगितामा भारतका सुरोजित सरकारले 1 रजत र एक काँस्य पदक जितेका थिए। आफ्नो अन्तिम जुनियर वुशु खेलमा 3 स्वर्ण जितेकी रेजिनाले उपलब्धिप्रति खुशी व्यक्त गरेकी छिन । रेजिना तामाङ भारतको राजधानी दिल्लीमै जन्मिएको भए पनि उनका बुवा किशन तामाङ र आमा कमला तामाङ नेपालको नुवाकोटका वासिन्दा हुन ।
उनिहरु लामो समयदेखि दिल्लीको मोडल टाउनमा बसोबास गरिरहेका छन । नेपाल मूलकै वुशु प्रशिक्षक मोनी लामाको प्रशिक्षणमा रेजिनाले कयौं वर्षदेखि भारतका लागि पदकहरु जित्दै आएकी छिन । रेजिनाले ताउलूको ननक्वान, नानदाओ र नानगुन प्रतिस्पर्धामा 3 स्वर्ण जितेकी थिइन । यसअघि उनले जुनियर एसीयाली च्याम्पियनशीपमा भारतलाई काँस्य पदक दिलाएकी थिइन । दिल्ली विश्वविद्यालयमा ओपनबाट स्नातक गरिरहेकी रेजिनाले अब दिल्लीका तर्फबाट सिनियर प्रतियोगितामा भाग लिनेछिन । रेजिना तामाङसँगै सुरोजित सरकार पनि मोनी लामासँग मोडल टाउनमा प्रशिक्षण लिने गर्दछन।
