रुस, 5 सेप्टेम्बर 2020
रुसका वैज्ञानिकहरुले विकासित गरेको कोरोना भाइरस विरुद्धको खोपमाथि भएको प्रारम्भिक परिक्षणमा सकारात्मक नतीजा देखिएको छ । रुसका वैज्ञानिकहरुले परिक्षणमा शारीरिक प्रतिरोधबारे देखाएका संकेतहरु समेटिएको पहिलो प्रतिवेदन शनिवार सार्वजनिक गरेको छ । मेडिकल जर्नल दि लान्सेटमा प्रकाशित सो प्रतिवेदनमा परिक्षणमा संलग्न प्रत्येक सहभागीमा भाइरस विरुद्ध लड्ने एन्टीबडी विकासित भएको तथा नकारात्मक प्रभाव नदेखिएको जनाइएको छ ।
रुस सरकारले यस खोपको स्थानिय स्तरमा प्रयोग गर्न गत अगस्तमा नै अनुमति दिएको थियो । खोप सम्बन्धी आवश्यक तथ्याङ्कहरु बहिरिनु अघि नै खोप प्रयोगका लागि तयार हुने रुस विश्वकै एक मात्र पहिलो मुलुक हो । तर अझै पनि स्वास्थ विशेषज्ञहरुले यस खोपको प्रभावकारिता र सुरक्षा प्रमाणित गर्न अझै धेरै परिक्षणको आवश्यकता रहेको औल्याएका छन् ।
तर ती समीक्षकहरुलाई सिधा उत्तर दिने हिसाबले मस्कोले खोपको परिणामलाई निकै प्रशंसा गरेको छ । केही पश्चिमी विशेषज्ञहरुले रुसको खोप निर्माण सम्बन्धी कामको तिव्रतालाई लिएर चिन्ता व्यक्त गर्नुका साथै अनुसनधानकर्ताहरुले हतार गरेको हुनसक्ने बताएका छन् ।
गत महिना रुसका राष्ट्रपति भ्लादिमिर पुटिनले खोपले आवश्यक सम्पूर्ण परिक्षण पार गरेको तथा आफ्नी एक छोरी माथि समेत यो खोप प्रयोग गरिएको बताउनु भएको थियो । दि लान्सेटका अनुसार स्पुटनिक – ५ नामक खोपको दुई वटा परिक्षण जुन र जुलाई महिनाबिच गरिएको थियो ।
सो परिक्षणमा संलग्न ३८ जना स्वस्थ स्वयमसेवक मध्ये प्रत्येकलाई सो खोप दिइएको तीन साता पछि एउटा वुस्टर खोप दिइएको थियो । १८ देखि ६० वर्ष उमेर समुहका ती स्वयम सेवकलाई ४२ दिन सम्म अवलोकन र अनुगमनमा राखिएको थियो ।
तिनीहरु सबैमा तीन साता भित्र एन्टिबडी विकास भएको थियो । अधिकांशमा टाउको र जोर्नीहरु दुख्ने जस्ता एउटै साइड इफेक्ट देखिएको बताइएको छ । खोपको तेश्रो चरणको परिक्षणमा विभिन्न जोखिम र उमेर समुहका ४० हजार स्वयम सेवक सरिक हने बताइएको छ ।
