काठमाण्डौँ, 11 फरवरी 2020
विज्ञानमा महिलाको पहुँच बढाउने उद्देश्यसहित नेपाली महिला वैज्ञानिकहरु संगठित भएका छन्। नेपाल विज्ञान प्रविधि प्रज्ञा प्रतिष्ठान (नाष्ट)-सँग आवद्ध महिला वैज्ञानिकहरुले मंगलबार ‘विज्ञानमा महिला पहुँचको अन्तर्राष्ट्रिय दिवस’-का अवसरमा ‘महिला वैज्ञानिक फोरम’ नेपालको गठन भएको घोषणा गरेका हुन्। नाष्टको भगिनि संस्थाको रूपमा गठन भएको फोरमले महिला वैज्ञानिकहरुलाई सक्रिय अनुसन्धानमा थप प्रभावकारी बनाउँदै उत्पादनशिल बनाउन सहयोग पुऱ्याउने महिला वैज्ञानिकहरुले बताएका छन्।
महिला वैज्ञानिक ज्योती गिरीले विज्ञानको क्षेत्र, मेडिकल साइन्सको क्षेत्र र इन्जिनियरिङ क्षेत्रमा भएका महिलाहरुलाई एकिकृत गरी उर्वरशिल, उत्साहजनक, उत्पादनशिल रुपमा देशलाई योगदान दिन महिला वैज्ञानिक फोरमले सहयोग पुऱ्याउने बताउनुभयो।
कार्यक्रममा देशको समृद्धिमा महिला बैज्ञानिकको भूमिकाका विषयमा छलफल भएको थियो। त्यस्तै फोरमले सिनियर महिला बैज्ञानिक र आउँदै गरेका महिला बैज्ञानिकको बीचमा समन्वय गराई अनुशन्धानलाई थप प्रभावकारी बनाउने र नयाँ पुस्तालाई आकर्षित गर्न सहयोग पुऱ्याउने विश्वास महिला वैज्ञानिकहरुले गरेका छन्।
