काठमाडौं, 28 अगस्त 2021
कांग्रेस वरिष्ठ नेता रामचन्द्र पौडेल पक्षका जिल्ला सभापतिहरुको जारी अनशन आजबाट तोडिने भएको छ । शुक्रबार साँझ कांग्रेस सभापति एवम् प्रधानमन्त्री शेरबहादुर देउवासँग वरिष्ठ नेता पौडेलसँग महाधिवेशनका बारेमा सहमति भएपछि जिल्ला सभापतिहरुले अनसन तोड्न लागेका हुन्।नेताबीच सहमति भएपश्चात् चार दिनदेखि जिल्ला सभापतिहरुले बस्दै आएको अनसन तोड्न लागेका हुन्। जिल्ला सभापतिको उम्मेद्वारका बारेमा बनाइएको दोहोरो मापदण्ड खारेज गर्नुपर्ने, क्रियाशील सदस्यता सूची सार्वजनिक गर्नुपर्ने लगायतका माग राखेर जिल्ला सभापतिहरु रिले अनशनमा थिये । सभापति देउवा र वरिष्ठ नेता पौडेलबीच छलफल भएपछि क्रियाशिल सदस्यका विवाद समाधान गर्दै नामावली सार्वजनिक गर्ने, जिल्ला सभापति र युवा नेताहरू राखेका माग सम्बोधन गर्दै रिले अनसन तोडाउने र महाधिवेशनको वातावरण तयार गर्ने समझदारी बनेको नेता प्रकाशमान सिंहले जानकारी दिनु भयो।
बैठकमा सहभागी काठमाडौं जिल्ला सभापति सबजु बानियाँले भन्नु भयो, ‘अब सिंगो टिमनै महाधिवेशन सफल पार्न लागि पर्नेछ । अनशनमा बस्नुभएको सभापतिहरु पनि आज अनसन तोड्नुहुन्छ र महाधिवेशन सफल बनाउन लाग्नुहुन्छ । क्रियाशील सदस्यको नियम अनुसारनै टुङ्गो लगाउने कुरा भएको छ ।’ बिहीबार देखिनै जिल्ला सभापतिहरुको माग अनुरुप क्रियाशील सदस्यको नामावली प्रकाशित गर्ने क्रम सुरु भएको छ । ४८ जिल्लाका कृयाशील सदस्यको नाम पार्टी वेबसाइटमा प्रकाशित गरिसकेको प्रवक्ता विश्वप्रकाश शर्माले बताए । ‘अब बाँकी जिल्लाको पनि प्रकाशित हुँदै जान्छ ।’
काङ्ग्रेसले यही भदौ १८ गते वडा अधिवेशन गर्दैछ, त्यसका लागि निर्वाचन अधिकृत खटिएका छन्।
