दार्जीलिङ, 11 अप्रेल/ शिला पोखरेल
गोर्खा राष्ट्रिय मुक्ति मोर्चा, केन्द्रीय समिति अध्यक्ष मन घिसिङले लकडाउनका कारण समस्यामा परेकाहरूलाई सक्दो सहयोग गर्न अपिल गर्नुभएको छ। साथै अध्यक्ष घिसिङले राहत तथा खाद्यान्न वितरण गरेको फोटो सामाजिक संजालमा सार्वजनिक नगर्न निर्देशन पनि दिनुभएको छ। एक प्रेस विज्ञप्ती जारी गर्दै गोरामुमो अध्यक्ष घिसिङले सो कुरा बताउनुभएको हो।
अध्यक्ष घिसिङले कोरोना भाइरस प्रकोपका कारण दैनिक ज्यालादारीमा काम गर्ने मजदुरहरू सबैभन्दा संकटमा परेको भन्दै उनिहरूलाई सक्दो सहयोग गर्न दलका केन्द्रीय समितिका सम्पुर्ण सदस्यहरू, दार्जीलिङ शाखा, खर्साङ शाखा, कालेबुङ शाखा, मिरिक शाखा कमिटीका अध्यक्ष, सचिवलगायत प्रतिनिधिहरू, प्रत्येक समष्टिका सभापति, सचिव एवम् प्रतिनिधिवर्गहरु, शाखा प्रशाखाका प्रतिनिधिवर्गहरु, गोरानास, गोरामुमो श्रमिक संगठन एच.पी. डब्लूयु., गोरामुमो युवा एकाई, गोर्खा राष्ट्रिय भुतपुर्व संगठन साथै गोराबिमोलाई अपिल गर्नुभएको हो। उहाँले अहिले सबै एकजुट भएर कोरोना भाइरसको संक्रमणलाई परास्त गर्नुपर्ने समय भएको बताउनुभयो।
उहाँले आफ्नो पार्टी र पार्टीका भातृ संगठनहरुले कोरोना भाइरसका कारण उत्पन्न संकटको बेला जनताको सेवक बनेर निभाएको भुमिको सराहना गर्दै उनिहरूलाई धन्यवाद ज्ञापन गर्नुभयो।
उहाँले सरकारद्वारा जारी लकडाउन अध्यादेशको पालन गर्न सबैलाई अनुरोध गर्नुभयो।
अध्यक्ष घिसिङले कोरोना भाइरसको संक्रमणलाई रोक्ने एउटा मात्र उपाय घर भित्रै बस्नुपर्ने भएपनि अझै पनि दार्जीलिङ, कालेबुङ, खर्साङमा सरकारद्वारा जारी अध्यादेशको अवहेलना गरि मानिसहरु बिना कारण बजारमा घुमिरहेको प्रती आपत्ति जनाउनुभयो। लकडाउन हाम्रै सुरक्षाको निम्ति भएकोले आफू बच्न र अरुलाई पनि बचाउन घर भित्रनै बस्न उहाँले अपिल गर्नुभयो।
