कञ्चनपुर, 4 फरवरी 2020/ हिम शाह
सुदूरपश्चिम प्रदेशको कञ्चनपुर जिल्लाका तीन स्थानीय तहले आवासविहिन विपन्न परिवारका लागि नमुना एकीकृत वस्ती निर्माणको प्रकृया अघि बढाएका छन्। वेदकोट नगरपालिका, भीमदत्त नरगपालिका र महाकाली नगरपालिकाले एकीकृत वस्ती निर्माणको प्रकृया अगाडी बढाएका हुन्। विपन्न, भूमिविहिन र दलित समूदायलाई लक्षित गरी राष्ट्रिय मुक्त हलिया समाज र हेविटाट नेपाल नामक गैरसरकारी संस्थाको साझेदारीमा वस्ती निर्माण कार्य अघि बढाइएको हो। ती संस्थाहरुले प्राविधिक सहयोगसहित प्रति घर निर्माणका लागि 1 लाख रुपैयाँ सहयोग प्रदान गर्ने जानकारी दिइएका छन्। वेदकोट नगरपालिकामा विपन्न परिवारका लागि 48 वटा घर निर्माण हुने भएको छ। जसका लागि विस्तृत परियोजना प्रतिवेदन डीपीआर तयार गरिएको छ।
आवास निर्माणका लागि तराई मधेश समृद्धि कार्यक्रमको 50 लाख, सांसद नरबहादुर धामीको स्थानीय पूर्वाधार विकास साझेदारी कार्यक्रम अन्तर्गत 45 लाख रुपैयाँ रकम खर्च गरिने साझेदारी संस्था राष्ट्रिय मुक्त हलिया समाज कञ्चनपुका अध्यक्ष शिवी लुहारले जानकारी दिनुभयो। उहाँका अनुसार आवास निर्माणको कुल लागतको 10 प्रतिशत रकम नगरपालिकाले ब्यरोर्ने छ।
यसैगरी भीमदत्त नगरपालिकमा 70 वटा घर निर्माण हुने भएको छ। जसका लागि प्रदेश सरकारको 30 लाख, सांसद ड. दीपक प्रकास भट्टको स्थानीय पूर्वाधार विकास साझेदारी कार्यक्रम अन्तर्गतको 50 लाख र नगरपालिकाले 20 लाख रुपोयाँ लगानी गर्ने सम्झौता भएको छ।
महाकाली नगरपालिकामा सांसद भट्टको स्थानीय पूर्वाधार विकास साझेदारी कार्यक्रम अन्तर्गतको 50 लाख, तराई मधेश समृद्धि कार्यक्रमको 25 लाख र नगरपालिकाको 79 लाख रुपैयाँ लागतमा आवास निर्माण हुने समाजका अध्यक्ष लुहारले जानकारी दिनुभयो।
आवास निर्माणमा प्रदेश सरकारको पनि सहयोग हुने बताइएको छ।
