काठमाडौं,२० जनवरी २०२०
जनकपुर उड्नै लागेको बुद्ध एयरको जहाजले सोमबार बिहान यति एयरको जहाजलाई छोएको छ ।
त्रिभुवन विमानस्थलमा जहाजको चापका कारण पार्किङ क्षेत्रमा पटक पटक यस्तो घटनाहरु दोहोरिन थालेका छन् ।
सोमबार (बिहान) ८ बजे जनकपुर उड्नै लागेको बुद्ध एयर जहाज ट्याक्सी (वेबाट धावनमार्गतर्फ जाँदै थियो । सोही क्रममा जहाजले पार्किङ वेमा राखिएको यति एयरलाइन्सको जहाजसँग ठोक्किएको थियो ।
‘ कुनै क्षति देखिदैन,’ बुद्धका एक अधिकारीले भने, ‘तर, एक जहाजले अर्को जहाजलाई छुनासाथ त्यो जहाजले उडान गर्न पाउँदैन ।’
उनका अनुसार नेपाल नागरिक उड्डयन प्राधिकरणका अधिकारीले निरिक्षण गरी पास गरेपछि मात्र जहाज उडाउन पाइन्छ ।
त्यसपछि जनकपुर उडान केहीबेर रोकिएको थियो । बुद्धले अर्को जहाज आइसकेपछि जनकपुर उडान नियमित गरेको छ ।
धेरै जहाज र साँघुरो संरचना भएपछि अहिले त्रिभुवन विमानस्थलमा जहाजहरु छोइने र ठोक्किने क्रम बढेको विमानस्थल प्रशासन बताउँछ ।
