नयाँदिल्ली, २ फेब्रुअरी
नेपालकी चलचित्रकी नायिका पूजा शर्मा पछिल्लो समयकी व्यस्त नायिका हुन् । उनले, एकपछि अर्को चलचित्र साइन गरिरहेकी छिन् ।
यो बर्ष मात्र उनले ५ वटा चलचित्रको छायांकन सक्ने पक्का देखिएको छ । बिहिबार शुभसाइत भएको चलचित्र ‘मन परेसी’सँगै उनले ५ वटा चलचित्रको छायांकन यो बर्ष सक्ने छिन् । यो बर्ष उनले ‘सम्हालिन्छ कहिले मन, पोई पर्यो काले, म यस्तो गीत गाउँछु २ र संझना विर्सना’को छायांकन सकिन् ।
पूजाले अभिनय गरेका चलचित्रले बक्स अफिसमा राम्रै व्यापार गरेपछि उनको क्रेज चुलिएको हो । निर्माता पनि उनलाई लिएर चलचित्रमा काम गर्न लालयित छन् । तर, यसरी एकपछि अर्को चलचित्रमा साइन गर्दा पछि काम नै नपाइने डर हुन्छ । के पूजाले यो बिषयमा सोचेकी छिन् त ?
पूजा भन्छिन्–‘मैले काम एकपछि अर्को चलचित्रमा गरेपनि रिलिज भने एकसाथ हुने होइन । फेरि, चलचित्रको कथा मन परेपछि कुनै पनि कलाकारले छाड्न सक्दैन । मैले पनि यही नै गरेको हुँ ।’
यी मध्ये यो बर्ष दर्शकमाझ ‘पोई पर्यो काले’ रिलिज भैसकेको छ भने ‘म यस्तो गीत गाउँछु २’ फागुणको २५ गतेबाट रिलिज हुँदैछ । नायिका शर्माका अन्य तीन चलचित्र आउँदो बर्ष रिलिज हुने पक्का छ ।
