अछाम, 19 फरवरी 2020/ हिम शाह
नेपाली काँग्रेसका केन्द्रीय सदस्य तथा पुर्व मन्त्री दिलेन्द्र प्रसाद बडुले वर्तमान सरकार सबै नेपालीको नभएर नेकपाको मात्र सरकार भएको आरोप लगाउनुभएको छ। सरकारका गतिबिधि हेर्दा यो नेपाली जनताको सरकार नभएर नेकपाको मात्रै सरकार हो कि जस्तो लागेको आभाष भएको बडुले बताउनुभयो। नेपाल प्रेस यूनियन अछामले बुधबार साफेबगरमा आयोजना गरेको पत्रकार सम्मेलनमा बडुले सो कुरा बताउनुभएको हो। उहाँले राज्यका संवैधानिक निकायहरु पनि सरकारको प्रभावमा परेर संविधानको मर्म विपरित काम गरिरहेका बताउनुभयो।
उहाँले अख्तियार सरकारको प्रभावमा परेर काम गरिरहेको आरोप लगाउनुभयो। बडुले भ्रष्टाचारीलाई कारवाही गर्नमा काँग्रेसको विरोध होइन तर कानुनको प्रयोग विभेदपुर्ण भएको बताउँदै यसमा काँग्रेसको गम्भीर आपत्ति रहेको सुनाउनुभयो।
न्यायालयले सहि र गलत छुट्याउला तर त्यहाँ पुर्याउने बाटो नै गलत भयो ललिता निवास प्रकरण बारे बोल्दै बडुले भन्नुभयो। सरकारले ल्याउन लागेका प्राय कानुन विधेयकहरु संविधानको मर्म विपरित छन्। सरकारले ल्याउने विकास बजेट सन्तुलित खालको छैन। सरकारको बजेटको प्राथमिक्ता पछाडि परेको क्षेत्रको बिकासका लागि छैन। सुदूरपश्चिमको बिकासका लागि सबै दल एक ठाउमा उभिनुपर्छ पूर्व मन्त्री बडुले भन्नुभयो।
पश्चिम सेती, अपर कर्णाली जस्ता आयोजना बन्नुपर्छ। एम.सी.सी. नेपालको विकासका लागि निकै आवश्यक छ। प्रजातन्त्र सस्थागत गर्न बिकास र सम्बृद्धि पहिलो आवश्यकता हो त्यसका लागि एम.सी.सी. आवश्यक छ भनेर काँग्रेसको नेतृत्वको सरकारले हस्ताक्षर गरेको हो। एमसीसीको बिषय बारे कांग्रेस स्पस्ट छ तर नेकपा भित्र केही दुबिधा रहेको देखियो। सैन्य गठबन्धनमा जाने कुरा हाम्रो पनि समर्थन छैन।
काँग्रेसले शसक्त प्रतिपक्षको भूमिका खेल्न किन नसकेको भन्ने प्रश्नमा बडुले सरकारका गलत कामको विरोध रचनात्मक रुपमा भैरहेको बताउनुभयो। काँग्रेस जिम्मेवार प्रतिपक्ष हो। नेकपाको जस्तो प्रतिपक्ष कांग्रेस होईन। पाटीमा आन्तरिक विवाद हुनु सामान्य हो तर यसले गर्दा शसक्त प्रतिपक्षको भूमिका निर्वाह गर्न कुनै असर परेको छ। मुलुकको सम्बृद्धिका लागि कांग्रेसको नेतृत्वमा सरकार जरुरी छ। नेकपाको नेतृत्वको सरकारले देशको सम्वृद्धि संभव छैन।
