डडेल्धुरा, १६ मार्च, २०२०
भारतसँग सीमा जोडिएका दुई नाका बन्द गरिने भएको छ । डडेल्धुराको भित्री मधेसमा पर्ने परशुराम नगरपालिकाको तातापानी सिसमजालाघाट र परिगाँउ बाङघाट नाका चैत ४ गतेदेखि अनिश्चित कालका लागि बन्द गर्ने निर्णय गरिएको हो ।
स्वास्थ्य सतर्कतालाई ध्यानमा राख्दै नगरपालिकाले अर्को सूचना प्रकाशन नभएसम्मका लागि तारउतारघाट बन्द गरिएको परशुराम नगरपालिकाका प्रमुख प्रशासकीय अधिकृत तारानाथ पनेरुले जानकारी दिए । उनले भने, ‘हेल्थ डेस्क स्थापना भएपनि आवश्यक स्वास्थ्य सुरक्षाको अभाव देखिएकाले तत्कालका लागि नगरपालिकाअन्तर्गत रहेका दुईवटै नाका हाललाई बन्द गर्ने निर्णय गरिएको हो।’ विश्वमा फैलिएको कोरोना भाइरस (कोभिड-१९) को संक्रमणलाई मध्यनजर गर्दै सूचना जारी गरी अनिश्चित कालका लागि परशुराम नगरपालिका- ५ को बाङघाट र परशुराम नगरपालिका-६ को सिसमजालाघाट पूर्ण रुपमा बन्द गरिने परशुराम नगरपालिकाका नगरप्रमुख भीमबहादुर साउदले जानकारी दिए। उनले भने, ‘कोरोना संक्रमित मानिस यो नाकाहरुबाट आउला न आउला, तर सतर्कताका लागि चैत ४ गतेदेखि केही समयका लागि तारउतारघाट बन्द गरिनेछ।’ परशुराम नगरपालिका, जिल्ला स्वास्थ्य कार्यालय र सरोकारवालाहरुको संयुक्त अनुगमन पश्चात नाका बन्द गर्ने निर्णय गरिएकोसमेत नगरप्रमुख साउदले बताए ।
