धनगढी, 8 अप्रेल/ हिम शाह
कोरोना भाईरस (कोभिड –19) परीक्षणका लागि सुदूरपश्चिमबाट हालसम्म 1 हजार बढीकोे नमुना संकलन गरिएको छ। बुधबार सुदूरपश्चिम प्रदेश सामाजिक विकास मन्त्रालयले दिएको जानकारी अनुसार 1 हजार 1 जनाको नमुना संकलन गरिएको हो।
मन्त्रालयका जनस्वास्थ्य महाशाखा प्रमुख नरेन्द्र सिंह कार्कीका अनुसार संकलन गरिएका नमुना मध्ये 1 सय 84 जनाको मात्रै रिपोर्ट आएको छ। जसमा 4 जना कोरोना पोजेटिभ केहि दिन अगाडी आएका थिए भने बाकी 1 सय 80 जनाको रिपोर्ट नेगेटिभ आएको छ। उहाँका अनुसार अब 8 सय 17 जनाको परीक्षण रिपोर्ट आउन बाकी रहेको छ।
प्रदेशका विभिन्न अस्पताल, र्यापिड टेष्टको टोली र नेपाली सेनाको टोलीले अहिलेसम्म 1 हजार 1 जनाको नमूना संकलन गरेका हुन्। नमूना संकलनको कार्यलाई तिव्रता दिइएको भएपनि परीक्षण भने निकै सुस्त भइरहेको छ।
बुधबार प्रदेशमा स्थापना भएको कोरोना भाईरस परीक्षण प्रयोगशालामा 6 र राष्ट्रिय जनस्वास्थ्य प्रयोगशालामा 4 जनाको मात्रै नमूना परीक्षण गरिएको हो। 1 सय 84 वटा थ्रोट स्वावको नमूना परीक्षण भएकोमा अहिलेसम्म चार जना बाहेक सबैकको रिपोर्ट नेगेटिभ आएको प्रदेश जनस्वास्थ्य प्रयोगशाला धनगढीले जनाएको छ।
