काठमाण्डौँ, 14 अप्रेल
नेपालमा कोरोना भाइरस (कोभिड-19) संक्रमितको संख्या 16 पुगेको छ। पेप्सीकोला टाउन प्लानिङमा रहेको सनसिटी अपार्टमेन्टमा बस्दै आएका 2 जनामा कोरोना पोजेटिभ देखिएसँगै संक्रमितको संख्या 16 पुगेको हो। बेलायतबाट आएका एकै परिवारका 3 जनामा बैसाख 1 गते आरडीटी विधिबाट परीक्षण गर्दा पोजेटिभ देखिएको थियो। पाटन अस्पतालमा पीसीआर विधिबाट थप परीक्षण गर्दा 2 जनामा पोजेटिभ देखिएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताउनुभयो। एक जनाको रिपोर्ट आउन भने बाँकी रहेको छ। उनीहरुको सम्पर्कमा आएका व्यक्तिहरुको कन्ट्याक्ट ट्रेसिङको काम भइरहेको प्रवक्ता डा. देवकोटाले बताउनुभयो। अहिले कैलालीमा 5, वीरगञ्जमा 4, बागलुङमा 2 जनाको उपचार भइरहेको छ। यसैगरी राष्ट्रिय प्रयोगशाला टेकुमा 2 र पाटन अस्पतालमा 2 जनाको उपचार भइरहेको छ। 1 जना उपचारपछि घर फर्किसकेका छन्।
सरकारले परीक्षणको दायर फराकिलो बनाएको छ। अहिलेसम्म स्वाव नमुना परीक्षण (पीसीआर) विधिबाट 6 हजार 2 सय 99 जनाको परीक्षण गरिएको छ। पछिल्लो 24 मा 5 सय 84 वटा नमुना परीक्षण भएको मन्त्रालयले जनाएको छ। राष्ट्रिय जनस्वास्थ्य प्रयोशालामा मात्रै 4 हजार 8 सय 19 वटा जनाको परीक्षण भएको पछिल्लो 24 घण्टामा 3 सय 87 जनाको नमुना परीक्षण गरिएको प्रवक्ता डा. देवकोटाले बताउनुभयो। प्रयोशाला बाहिर अहिलेसम्म 1 हजार 4 सय 80 जनाको नमुना परीक्षण भएको छ। पछिल्लो 24 घण्टामा मात्रै 1 सय 97 वटा परीक्षण भएका छन्। ऱ्यापिड डाइग्नोष्टिक विधिबाट अहिलेसम्म 6 हजार 6 सय 7 वटा परीक्षण भएका छन्। पछिल्लो 24 घण्टामा मात्रै 13 सय 16 वटा परीक्षण भएको मन्त्रालयले जनाएको छ। अहिले 5 हजार 7 सय 71 जना क्वारेन्टिनमा रहेका छन्। उपत्यकामा 12 र उपत्यकाबाहिर 87 गरी 99 जना आइसोलेसनमा रहेको मन्त्रालयले जनाएको छ। ऱ्यापिड किटलाई विदेशबाट आएका व्यक्तिहरुको परीक्षणलाई तिव्रता दिइएको छ। देशभरी नै किट वितरण गरिएपनि अझै 21 जिल्लामा परीक्षण हुन बाँकी रहेको मन्त्रालयले जनाएको छ।
