काठमाण्डौँ, 22 अप्रेल
नेपालका लागि भारतीय राजदूत विनय मोहन क्वात्राले कोरोना भाइरस (कोभिड-19) नियन्त्रणका लागि नेपालले गरेको प्रयास दक्षिण एशियाका लागि उदाहरणिय रहेको बताउनुभएको छ। भारत सरकारले सहयोग गरेका अत्यावश्यक औषधि हस्तान्तरण गर्दै राजदूत क्वात्राले कोभिड-19 नियन्त्रणका लागि नेपालको प्रयास उदाहरणिय रहको बताउनुभएको हो। विश्वव्यापी महामारीका रुपमा रहेको कोभिड-19 महामारीको सशक्त र सकारात्मक रूपले नेपाल र नेपाली जनताले गरिरहेका सामना प्रशंसनिय मात्रै नभएर एसिया क्षेत्रका लागि उदाहरणिय रहेको उहाँले बताउनुभयो। सङ्कटको यस घडीमा नेपाल तथा अन्य दक्षिण एसियाली साझेदार मुलुकहरुसँग एकसाथ तयारी गर्न, कदम चाल्न र सफलता प्राप्त गर्न भारत प्रतिबद्घ रहेको उहाँले बताउनुभयो।
सहयोग सामग्री बुझ्दै स्वास्थ्य तथा जनसंख्यामन्त्री भानुभक्त ढकालले जस्तोसुकै अफ्ठ्यारो परिस्थितिमा पनि भारतले नेपाललाई सहयोग गर्न गर्छ भन्ने उदारहण दिएको बताउनुभयो। आफुलाई परेको अफ्ठ्यारोमा पनि छिमेकीको नाताले भारतले गरेको सद्भाव र सहयोगका लागि मन्त्री ढकालले धन्यवाद ज्ञापन गर्नुभयो।
भारत सरकारले विभिन्न 18 किसिमका 23 टन औषधि नेपाललाई दिएको हो। प्राप्त सहयोग नेपालका लागि भारतीय राजदूत क्वात्राले स्वास्थ्यमन्त्री ढकाललाई हस्तान्तरण गर्नुभयो। पारासिटामोलको 3.2 लाख डोज र हाईड्रोक्सीक्लोरोक्वीनको 2.5 लाख डोज गरी कुल 8.25 लाख डोज अत्यावश्यक औषधिहरु नेपाललाई सहयोग गरेको हो। औषधिहरु विभिन्न चरणमा प्राप्त हुने मन्त्रालयले जनाएको छ। यसैबीच बुधबार चीनको तिब्बत सरकारले पनि विभिन्न स्वास्थ्य सामग्री सहयोग गरेको छ। 10 हजार एन 95 मास्क, 10 हजार थान पीपीइ र एक हजार थान इन्फ्रारेड थर्मोमिटर सहयोग गरेको मन्त्रालयले जनाएको छ। यस्तै दुई वटा पिसिआर मेसिन, भिटिएमसहित 20 हजार थान टेस्टिङ किट। 50 बक्स डिसइन्फेक्सन वेट वाइप पनि दिएको छ। सो स्वास्थ्य सामग्री चिनियाँ अधिकारीहरुले बुधबार तातोपानी नाकाबाट नेपाली पक्षलाई हस्तान्तरण गरेको छ। बुधबार साँझासम्म स्वास्थ्य सामग्री काठमाडौं आइपुग्ने स्वास्थ्य तथा जनसंख्या मन्त्रालयका प्रवक्ता डा. विकास देवकाटोले बताउनुभयो।
