नयाँ दिल्ली डेस्क, 22 अप्रेल
वैश्विक महामारी कोरोना भाइरसबाट विश्वभरीमा अहिलेसम्म 1 लाख 79 हजार 32 जनाले ज्यान गुमाइसकेका छन्। यस भाइरसबाट संक्रमित हुनेहरूको संख्या 25 लाख 78 हजार 205 पुगेको छ भने, 7 लाख 4 हजार 873 जना उपचारपछि ठिक भएका छन्। कोरोना भाइरसको कारण अमेरिकामा सबैभन्दा बढी 45 हजार 343 जनाको ज्यान गएको छ भने, संक्रमितको संख्या 8 लाख 19 हजार 175 पुगेको छ। अमेरिकापछि इटाली कोरोनाबाट सबैभन्दा बढी प्रभावित बनेको छ। त्यहाँ अहिलेसम्म 24 हजार 648 जनाको ज्यान गएको छ भने, 1 लाख 83 हजार 957 जनामा संक्रमणको पुष्टि भएको छ। त्यसैगरी स्पेनमा अहिलेसम्म 21 हजार 717 जनाले ज्यान गुमाएका छन् भने, त्यहाँ संक्रमितहरूको संख्या 2 लाख 8 हजार 389 पुगेको छ। फ्रान्समा अहिलेसम्म 20 हजार 796 जनाले कोरोना भाइरसका कारण ज्यान गुमाएका छन्। त्यहाँ संक्रमितहरूको संख्या 1 लाख 58 हजार 50 पुगेको छ।
चीनमा संक्रमितहरूको संख्या 82 हजार 788 पुगेको छ भने, 4 हजार 632 जनाले ज्यान गुमाएका छन्। चीनमा अहिलेसम्म 77 हजार 151 जना उपचारपछि सन्चो भएर घर फर्किएका छन् भने, 1 हजार 5 जनाको उपचार चलिरहेको छ।
भारतमा पनि कोरोना भाइरसको प्रकोप दिनप्रति दिन बढिरहेको छ। भारतमा अहिलेसम्म 20 हजार 178 जनामा कोरोना भाइरसको संक्रमण पुष्टि भएको छ। त्यसैगरी ज्यान गुमाउनेको संख्या बढेर 645 पुगेको छ। भारतमा पछिल्लो 24 घण्टामा 42 जनाले कोरोना भाइरसका कारण ज्यान गुमाएका छन्। त्यहाँ 3 हजार 976 जना उपचारपछि सञ्चो भएका छन्।
नेपालमा कोरोना भाइरसबाट संक्रमित हुनेहरूको संख्या बढेर 45 पुगेको छ। आज मात्र नेपालमा थप 3 जनामा कोभिड-19 को संक्रमण पुष्टि भएसँगै संक्रमितहरूको संख्या 45 पुगेको हो। नेपालमा 7 जना उपचारपछि पूर्ण रूपमा स्वस्थ्य भएर घर फर्किएका छन्।
