दार्चुला, 30 अप्रेल/ हिम शाह
गत महिनादेखि भारतको पिथौरागढस्थित धार्चुला र आसपास क्षेत्रहरूमा क्वारेन्टिन बसेका नेपाली मजदुर आज स्वदेश भित्रिन पाएका छन्। क्वारेन्टिन अवधि सकिए पनि नेपाल प्रवेको अनुमती नपाउँदा समस्यामा परेका उनिहरुको बिहिबार दार्चुलाका 2 र बैतडीको 1 गरी 3 वटा नाकाबाट स्वदेश फर्काइएको छ। जिल्ला प्रशासनल कार्यालय दार्चुलाका अनुसार दत्तु र खलङ्गा नाकाबाट आज 13 सयभन्दा बढी मजदुरहरूको उद्धार गरिएको छ। बैतडी, बझाङका नागरिकलाई दत्तु नाकाबाट प्रवेश गराईएको छ, भने दार्चुलालगायत अन्य जिल्लाका नागरिकहरूलाई खलङ्गा नाकामार्फत् स्वदेश भित्र्याइएको दार्चुलाका प्रमुख जिल्ला अधिकारी यदुनाथ पौडेलले बताउनुभयो।
उद्धारपछि स्वस्थ्य जाँच गर्दै अधिकांशलाई आजै गन्तव्यमा पठाइएको उहाँले बताउनुभयो। कैलाली र कञ्चनपुर सहित केही पूर्वी जिल्लाका नागरिकलाई भने खलङ्गाकै क्वारेन्टिनमा राखिएको प्रशासनले जनाएको छ।
त्यस्तै आज बैतडीको झुलाघाट नाकाबाट पनि मजदुरहरूलाई प्रवेश अनुमती दिइएको छ। जिल्ला प्रहरी कार्यालय कैलालीका अनुसार झुलाघाट नाकाबाट आज 1 हजार 50 बढीको उद्धार गरिएको छ। उनीहरुलाई सम्बन्धित पालिकाहरुमा पठाउने क्रम जारी रहेको प्रहरी कार्यालयले जनाएको छ। उनीहरुलाई स्थानीय तहले नै क्वारेन्टिनको व्यवस्था गर्नेछ।
