धनगढी, 7 मे 2020
भारतमा फसेका नेपाली नागरिकहरुको उद्धार र राहतको माग गर्दै नेपाली जनसम्पर्क समिती उत्तर भारत क्षेत्रले सुदुरपश्चिम प्रदेश सरकारका मुख्यमन्त्री त्रिलोचन भट्टलाई ज्ञापन पत्र बुझाएका छन्। भारतमा रहेका नेपालीहरुको ज्यानको सुरक्षाका लागि सरकार उदासीन नदेखिएका बेला नेजस केन्द्रीय समिति र उत्तर भारत समितिले भारतमा नेपालीहरुले भोगीरहेको समस्याबारे गम्भीर ध्यानाकर्षण गराउँदै राहत प्याकेजको घोषणा गर्न पनि माग गरेका छन्।
सुदुर पश्चिम प्रदेश सरकार मार्फत संघीय सरकार र भारतका लागि नेपाली राजदुतावस र सात वटै प्रदेश सरकारलाई गम्भिर ध्यानाकर्षण गराउन ज्ञापन पत्र बुझाएको नेपाली जनसम्पर्क समिति उत्तर भारत क्षेत्रका महासचिव खगेन्द्रबहादुर सिंहले बताउनु भयो।
कोराना रोकथामका लागि गरिएको लकडाउनका कारण भारतमा मजदूरी गर्न गएका हजारौंँ नेपालीहरु रोजगारविहीन भएको र विभिन्न शहरहरुमा अलपत्र पर्नुका साथै भोकभोकै मर्ने अवस्था आएकाले उनिहरुका लागि राहतको व्यवस्था गर्न अनुरोध गरेको सिंहले बताउनुभयो। भारतमा समस्यामा परेका मध्ये अधिकांश नेपालीहरु सुदूरपश्चिम प्रदेशकै भएकाले पनि सुदूर पश्चिम प्रदेशका मुख्यमन्त्रीलाई विशेष आग्रह गरिएको उहाँले बताउनुभयो।
नेपाली काँग्रेस बाजुरा जिल्लाका सभापति कविराज पण्डित र नेपाली काँग्रेस महाधिवेशन प्रतिनिधि पूर्णबहादुर सिंहको उपस्थितिमा नेपाली जनसम्पर्क समिति उत्तर भारत क्षेत्रका महासचिव खगेन्द्रबहादुर सिंहले ज्ञापन-पत्र बुझाउनु भएको हो।
ज्ञापन पत्र बुझ्दै सुदुरश्चिम प्रदेशका मुख्यमन्त्री त्रिलोचन भट्टले भारतमा अलपत्र परेका नेपालीहरुको अवस्थाबारे आफु जानकार रहेको र समस्या समाधानका लागि प्रदेश सरकारले संघीय सरकारसँग छलफल गरिरहेको बताउनु भएको थियो।
