काठमाण्डौँ, 8 मे 2020
कोशी प्रादेशिक अस्पताल विराटनगरमा उपचाररत 8 जना कोरोना संक्रमित निको भएर डिस्चार्ज भएका छन्। आज डिस्चार्ज भएका मध्ये 7 जना नेपाली र 1 जना भारतीय नागरिक रहेका छन्। 7 जनामध्ये 1 महिला छन्। कोशी अस्पतालकी मेडिकल सुपरिन्टेन्डेन्ट डा. संगीता मिश्रले उनिहरूको पछिल्लो कोरोना परीक्षण नेगेटिभ आएपछि डिस्चार्ज गरिएको बताउनुभयो। डिस्चार्ज भएकामध्ये महिलालाई उयदपुर पठाइने र अन्य पुरुषहरुलाई विराटनगरमै राखिने बताइएको छ। कोशी अस्पतालमा अझै 17 जना संक्रमित उपचाररत छन्। अघिल्लो पटक 6 जना डिस्चार्ज भएका थिए।
अस्पतालकी मेडिकल सुपरिन्टेन्डेन्ट मिश्रले आजै क्वारेन्टिनमा बसेका र कोभिड अस्पतालमा खटिएका पहिलो चरणका स्वास्थ्यकर्मी घर गएको जानकारी दिनुभयो। अस्पतालले कोभिड अस्पतालमा खटिएका स्वास्थ्यकर्मीलाई 21 दिन क्वारेन्टिनमा बस्ने व्यवस्था गरेको थियो।
नेपालमा कोरोना संक्रमितहरूको कुल संख्या 101 पुगेको छ। जसमध्ये अहिलेसम्म 30 जना संक्रमित निको भएर डिस्चार्ज भएका छन्। यसअघि डिस्चार्ज भएका वीरगञ्जका 2 जना र काठमाडौँका 1 व्यक्तिमा पुनः कोरोना पोजेटिभ आएपछि उनिहरु चिकित्सकको निगरानीमा छन्।
