काठमाण्डौँ, 13 मई 2020
शेयर बजारमा परिसूचक नेप्से 2 प्रतिशतले घटेपछि बुधबार पनि नेगेटिभ सर्किट लागेर कारोबार बन्द भएको छ। कारोबार सुरु भएदेखि नै निरन्तर ओरालो लागेको नेप्से परिसूचक 40 मिनेट नपुग्दै 2 प्रतिशतले घटेर बन्द भएको छ। नेपाल धितोपत्र बोर्डले लकडाउनको बेलामा दिनको 2 घण्टा बजार खोल्न सक्ने र नेप्सेमा 2 प्रतिशतको उतारचढाव भए 1 दिनका लागि कारोबार बन्द गर्ने व्यवस्था गरेको छ। सोही व्यवस्था अनुसार आज पनि बन्द हुने समय अघि नै नेगेटिभ सर्किट लागेर कारोबार बन्द भएको हो।
नेप्से परिसूचक 2 प्रतिशत अर्थात 24 दशमलव 58 अंकले घटेर 1 हजार 2 सय 1 दशमलव 57 अंकमा बन्द भएको छ। सेन्सेटिभ परिसूचक पनि 2 दशमलव 01 प्रतिशतले घटेको छ। यस्तै 74 वटा कम्पनीको 211 करोबारबाट 36 लाख 13 हजार 523 रुपैयाँ बराबरको 10 हजार 5 सय 26 कित्ता शेयर खरिद विक्री भएको छ। कारोबारमा आएका 11 वटै समुहका सूचकहरु घटेका छन्। यस्तै कारोबार भएका सबै कम्पनीको शेयर मूल्य पनि घटेको छ। सबै भन्दा धेरै कारोबार नेपाल टेलिकमको 8 लाख 62 हजार 9 सय 50 रुपैयाँको भएको छ। यस्तै लक्ष्मी बैंक र तारागाउँ रिजेन्सी होटलका शेयरधनीले 3 प्रतिशतले गुमाएका छन्।
