काठमाण्डौँ, 13 मई 2020
आज थप 2 जनामा कोरोना संक्रमण देखिएको छ। राष्ट्रिय जनस्वास्थ्य प्रयोगशाला र धुलिखेल अस्पतालको प्रयोगशालामा गरिएको परीक्षणमा 1/1 जनामा संक्रमित पुष्टि भएको हो। धुलिखेल अस्पतालमा आज गरिएको कोरोना परीक्षणमा बाँकेका 1 पुरूषमा संक्रमण देखिएको थियो। यसैगरी राष्ट्रिय जनस्वास्थ्य प्रयोगशालामा गरिएको परीक्षणबाट कपिलवस्तुका 1 पुरूषमा संक्रमण देखिएको हो।
स्वास्थ्य तथा जनसंख्या मन्त्रालयका सह–प्रवक्ता डा. समीरकुमार अधिकारीले आज थप 2 जनामा कोरोना संक्रमण देखिएसँगै नेपालमा कोरोना संक्रमितका संख्या 219 पुगेको जानकारी दिनुभयो। संक्रमित दुवैको स्वास्थ्य अवस्था सामान्य रहेको मन्त्रालयले जनाएको छ।
यसैबीच नेपालमा कोरोना विरुद्धको लडाई जित्नेको संख्या 35 पुगेको छ। आज चितवनकी 63 वर्षीया महिला कोरोना उपचारपछि सन्चो भएर डिस्चार्ज भएकी छन्।
