नयाँ दिल्ली, 9 जुलाई 2020
भारतको राजधानी दिल्लीमा कोरोनाबाट थप एकजना नेपाली संक्रमित भएका छन । दिल्लीको लक्ष्मीनगरमा सीए अध्ययनरत नेपाली विद्यार्थी कोरोनाका कारण संक्रमित भएका हुन । ज्वरो र घाँटीमा समस्या देखिएपछि उनले गए 6 तारिखमा कोरोनाको परीक्षण गराएका थिए । त्यसपछि हिजो दिल्ली सरकारका तर्फबाट आएको फोन मार्फत कोरोना पोजेटिभ भएको जानकारी दिइएको थियो । अहिले उनको अवस्था सामान्य रहेको छ । नेशनल लाईभसँग भएको कुराकानीमा उनले भने ” अहिले ज्वरो छैन र घाँटीको समस्या पनि सुधारोन्मुख छ ।” उनले बताए अनुसार दिल्ली सरकारका तर्फबाट निरन्तर फोन गरि स्थितिको जानकारी लिनुका साथै घरमै औषधी र अन्य अक्सीजन नाप्ने यन्त्र पुऱ्याइदिने भनिएको छ । काठमाण्डौको बालाजु घर बताउने कोरोना संक्रमित अहिले होम आइसोलेशनमा रहेका छन । यद्धपी दिल्ली सरकारका तर्फबाट सरकारी आइसोलेशन केन्द्रमा बस्न सुझाव दिइएपनि घरमा सुरक्षित र छुट्टै बसेकाले घरमै आइसोलेशनमा रहेको उनले बताएका छन ।
उनिसँगै दिल्लीमा सम्पर्कमा आउने कोरोना संक्रमित नेपालीको संख्या 24 पुगेको छ । त्यसमध्ये 2 जनाको मृत्यु भइसकेको छ भने 7 जना उपचारपछि निको भएर काममा समेत फर्किएका छन ।
